DATUK AMAR DOUGLAS UGGAH

KUCHING: Raban parti PBB dipinta enda diau diri tauka ngelakka 66 peratus pengundi baru ti beumur 18 ngagai 29 taun dibatak raban bukai kelebih agi parti penyakal.

Sapit Premier Sarawak ti mega Sapit Tuai Pemegai PBB Datuk Amar Douglas Uggah Embas madahka jeman di mua raban nembiak tu enggau PBB mesti begulai lalu raban parti dipinta bejalaika mayuh program ti engkeman dikena nangkup peminta raban pengundi baru.

“Naka 31 Disember 2021, Sarawak ngerikodka 1,927,750 iku nembiak ti ngerejister diri ngundi iya nya niki 675,077 iku pengundi baru.

“Ungkup pengundi baru, kitai meda 20 peratus pengundi berejister tu beumur 19-20 taun, 45 peratus beumur 21-29 taun enggau 19.23 peratus beumur 30-39 taun,” ku iya.

Uggah bejaku munyi nya rambau bejadika Gempuru Besai Komiti Nembiak enggau Orang Indu PBB ke-15 di Palan Aum Borneo Kuching (BCCK) ditu, kemari.

Ku iya, nya mai reti 66 peratus pemilih berejister baru beumur 18 ngagai 29 taun ke alai 75.23 peratus orang biak beumur 18 ngagai 39 taun.

“Ubah tu dibungkur enggau pemansang ICT, mobiliti enggau pelajar ti lebih manah ngujungka mayuh agi raban pengundi biak ti pintar enggau pandai.

“Raban sida tu dikumbai generasyen Zee (Z) ti lebih mar sereta berani bejaku,” ku iya.

Kelimpah ari nya, lebuh ditanya pemberita Uggah madahka parti deka ngubah konstitusyen ngambi Raban Orang Biak PBB ulih ditumbuhka.

“Deka bisi forum baru, diatu kitai udah bisi parti besai (Bapa), raban indu, raban nembiak enggau deka bisi raban orang biak PBB.

“Pekara nya deka diayanka dalam Aum Besai tu ke alai kitai deka meda gaya baka ni konstitusyen tu diubah,” ku iya.

SEMANGAT…Entara raban nembiak ke bisi ngulu Gempuru Besai Komiti Nembiak enggau Orang Indu PBB ke-15 di Palan Aum Borneo Kuching (BCCK) ditu, kemari. -Gambar GHAZALI BUJANG

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak