PEMUTUS MANAH…Apai Britniesyha (dua ari kanan) enggau indai iya Macris Man (kiba) begambar begulai enggau Britniesyha sereta pengajar iya.

Pemutus peresa Setipikit Pelajar Malaysia (SPM) pan udah dibantai Opis Menteri Pelajar Malaysia (KPM) udah meri dua chabang ati ngagai bala nembiak ke napi peresa tu ti nyambut enggau ati gaga tauka sinu.

Ati ti gaga diumbaka sabak nya tanda sida iya udah teulihka pemujur sekali enda tang nya ukai nyadi jalai pengujung ngagai raban nembiak besekula ngiga jalai pengidup.

Laban jalai agi mayuh deka ditujah sida iya dikena ngiga pengidup ungkup diri empu enggau diri sebilik jemah ila.

Siku nembiak ke nyulut ba pemutus SPM 2022 ari Sekula Sekondari (SMK) Pakan, Britnieysha Lovena anak Benick bekunsika pengasai ati diri pengudah nerima pemutus peresa nya, kemari.

Peranak Rumah Panjai Ladi Nanga Nasau Pakan, tu bulih 3A+, 3A, 1A-, 1B, 1C+ enggau 2C ba pemutus peresa iya.

Lebuh ditanya nama resia dikena iya ngulihka pemutus peresa tu, Britnieysha madahka diri endang enggau naka ulih nembuka latih rumah ti diberi pengajar sereta mega ngatur awak diri enggau belajar sereta aktiviti bukai.

“Sekeda ari chara aku iya nya, aku belajar ngaga latih tauka ngulang pelajar aku ba rumah maya tembu tembu kelas.

“Aku mega ngaga nota dikena aku ngingatka pekara ti udah diajar bala pengajar ambika pekara nya semampa lekat ba runding aku.

“Kelimpah ari nya mega, aku begigaka penerang ari Google dikena nambahka anak penemu aku bekaul enggau subjek ke dipelajar aku.

“Pia mega, aku selalu minta tulung ari bala bakih sereta mega bala pengajar enti pekara tauka utai nya enda ditemu aku,” ku Britnieysha nusuika resia belajar.

Ku tandu Britniesysha, iya chukup rinduka subjek Biologi enggau Kimia diumbaka mega tu endang entara subjek ti pemadu beguna ba dalam pelajar kemaya haritu.

“Chukup gaga endar asai ati lemai kemari lebuh aku teulihka pemutus peresa SPM aku lalu nya ngasuh ati aku ransing agi deka belajarka pekara ti baru jemah ila.

“Terima kasih ke sukung ari kami sebilik, bala pengajar enggau bala bakih ti semampai ngiri sereta ngembing aku enggau penemu.

“Pemujur aku tu endang pemujur ungkup kita semua laban ke udah meri peransang ngagai aku ambika semampai ngembuan pengeransing dalam pengawa besekula,” ku iya.

Britniesysha mega madahka, sekumbang maya pengerekai igi penyakit Covid-19 tu suba, mayuh amat pemar enggau penguji diasaika iya lebuh maya deka belajar lalu ngulang latih sekula.

Ku iya nusui,laban ke nadai arus penyambung ke meruan baka internet ba rumah panjai, tu amat meri penanggul ngagai iya lebuh belajar lalu deka betanya enggau bala bakih sereta pengajar.

“Nadai arus penyambung ti enda meruan chukup meri penguji ngagai aku kelebih agi lebuh aku deka betanyaka subjek ti mar baka Matematik enggau subjek Sains sereta ke bukai.

“Tang aku enda mantul ngapa laban penguji tu ngasuh aku gagit agi deka ngulihka pemutus peresa SPM ti manah ambika ulih meri pengaga ngagai kami sebilik sereta sekula aku,” ku iya nusuika penguji maya belajar.

Spengudah tu ila ku Britnieysha, iya deka nampung pelajar iya ngagai tikas ke tinggi agi lalu madahka diri deka masuk matrikulasi laban dikena nyapai juluk ati iya ti deka nyadi raban Pharmacist jemah ila.

“Ngagai bala bakih sereta nembiak rebak baru ke benung besekula, belajar mih enggau naka ulih.

“Pia mega, kitai mesti nyaga ulah diri, mendingka jaku apai indai sereta bebasaka bala pengajar lalu disiplin mih ke chukup beguna dikena kitai ngemujurka diri,” ku iya sempat meri jaku lalau ngagai nembiak ke agi besekula.

Ngena peluang tu, Suara Sarawak ngenataika pengaga ati ngagai semua nembiak ke mujur ba peresa SPM 2021 lalu ngagai sida ke bukai ti kurang mujur arapka anang mantul belajar laban pengawa belajar tu enda nemu abis.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak