TULUNG ARI DTTAS…Diana (enam ari kiba) nguluka bala DTTAS nyuaka barang bantu ngagai peranak Rumah Panjai Polly di Bukong Asal.

BETONG: Serakup Pemikir Dayak Sarawak (DTTAS) enda tinggal nganjung bantu ngagai peranak Rumah Polly di Bukong Asal apin lama ke udah.

Entara bantu ti bisi dibai raban DTTAS ungkup peranak rumah panjai tu iya nya 11 kambut bekal barang pemakai sereta beberapa kutak gari.

Ba pengawa ngulurka bantu ngagai sida Polly serumah, DTTAS ti betuaika Sapit Chairman gerempung tu iya nya Diana David Itang sempat ngabas palan tembawai angus.

Pia mega, Diana sempat meri jaku lalau ngagai mensia mayuh ambika semampai bejaga ari penusah ti enda disadang.

“Aku ngarapka mensia mayuh, kelebih agi bala kitai ke diau ba rumah panjai ambika semampai bejaga laban penusah baka karam di darat tu enda disadang kitai.

“Pia mega, aku ngarapka sida Polly serumah di Bukong Asal kering ati napi penguji ke udah ninggang sida iya serumah,” ku Diana.

Lebuh ditanya bekaul penusah angus tu nyadi, Tuai Rumah Polly madahka penusah tu nyadi enggau naka iya penyampat.

“Maya hari penusah tu nyadi, bala kami benung kiruh ngatur perengka ba rumah panjai kami ke baru.

“Laban perengka dikena kami berumah baru datai seharinya, nya alai kami serumah kisuk amat lebuh penusah tu ti ngenyit nyadi.

Iya mega ngenataika jaku beterima kasih ngagai raban DTTAS ti udah mantu sereta ngelempungka penusah ti ditapi sida iya serumah.

Naka ke diatu, sida iya agi diau ba taba rumah panjai sida ke baru lalu diatu benung pengawa ngaga rumah benung dipejalaika.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak