BEJADI…Abang Johari enggau bala bukai bejadika Jelatung Melepung enggau Landskap Tebing Sungai Sematan sereta Pengawa Nyuaka Perais Pekit Nginti Tanjong Datu di Waterfront Sematan ditu, kemari.-Gambar Opis Pemadah

SEMATAN: Dua buah hotel entarabansa peribit deka digaga ba Sematan/Lundu nengah ungkus pemeranak puku RM120 juta.

Premier Sarawak Datuk Patinggi Tan Sri Abang Johari Tun Openg madahka penumbuh dua bengkah hotel entarabansa nya deka narit mayuh agi temuai menua luar datai ke Sematan/Lundu.

“Palan tu bisi peluang ti besai nyadi palan dagang temuai sebaka enggau menua Dubai.

“Nya alai, mesti bisi palan diau ti manah seikas entarabansa pengabis nadai hotel entarabansa ditumbuhka ditu,” ku iya.

Abang Johari bejaku munyi nya rambau bejadika Jelatung Melepung enggau Landskap Tebing Sungai Sematan sereta Pengawa Nyuaka Perais Pekit Nginti Tanjong Datu di Waterfront Sematan ditu, kemari.

Ku iya, pekara nya mega deka muka peluang pengawa puang peranak besemak sereta ngerembaika ekonomi raban orang bedagang ti bisi.

“Pengujung ila ketam pan enda chukup ditu, ari nya kitai muka peluang nupi ketam ambika chunto.

“Udah nya, miding enda chukup, tu nyadi kelai rejeki peranak genturung Sematan/Lundu nyau ngelumpa.

“Ditu mega bisi Palan Penyulut Teknikal Sarawak (Centexs) endur anak kita belatih,” ku iya.

Iya nandu, Centexs ti disikap enggau mayuh keresa digital baka Augmented Reality (AR), Virtual Reality (VR) enggau ke bukai ulih nyeridi nembiak ti sekula dia belajarka pengawa dagang ti baru.

“Nya alai, besedia meh kita orang dagang ti diau ditu napi perambu pemansang ti dilanggur perintah.

“Dalam timpuh tiga taun serikat hotel entarabansa nya deka ngepunka pengawa numbuhka hotel sida ditu,” ku iya.

Sama bisi datai Speaker Dun Sarawak Tan Sri Datuk Amar Mohamad Asfia Awang Nassar, Menteri ba Opis Menteri Besai (Parlimen enggau Undang-Undang) ti mega Kaban Parlimen Santubong Datuk Seri Dr Wan Junaidi Tuanku Jaafar, Adun Tanjung Datu Azizul Annuar Adenan enggau ke bukai.

Suara Sarawak