BERITA KITAI…Bala kaban PBB ke bisi ngulu gempuru besai nya benung macha surat kabar Suara Sarawak enggau New Sarawak Tribune ke bisi disediaka komiti pengatur. -Gambar RAMIDI SUBARI

KUCHING: Perintah Gempung Parti Sarawak (GPS) deka meri pelajar pechuma ngagai anak Sarawak enti bisi belanja lebih.

Premier Sarawak Datuk Patinggi Tan Sri Abang Johari Tun Openg madahka pekara nya endang dalam ati iya ngambika Sarawak ngemansutka mayuh agi anak ti bepenau.

“Udah dalam niat aku, enti kitai bisi bisi belanja lebih, kitai meranakka puku ba Turu Reta Pesaka Bansa.

“Nyema kitai bulih mayuh agi, kitai meri pelajar pechuma ngagai anak Sarawak awakka penau sida nambah lalu sida deka nguna asil ti bisi ba Sarawak nambahka penatai pemisi ngujungka Sarawak nyadi wilayah ti mansang,” ku iya.

Abang Johari bejaku munyi nya rambau Bejadika Gempuru Besai PBB Ke-15 di Palan Aum Borneo Kuching (BCCK) ditu, kemari.

Ku iya, perintah ti dibai iya deka terus ngelangkar strategi dikena nambahka penatai pemisi menua awakka ulih meri pemaik enggau pemansang menua.

“Singapore deka minta kuasa karan, nya alai aku madahka sida Sarawak semina ulih meri maksimum 1,000 megawatt aja, enda lebih ari nya.

“Tang enti sida bisi ngatur pemeranak puku bekaul kuasa karan, baik aja ke Sarawak, udah nya sida setuju,” ku iya.

“Palan data nyadi seput ekonomi digital baka Microsoft, Google, Amazon enggau sida ti begunaka kuasa.

“Singapore engka enda ulih ngeluarka kuasa, nama enda kitai ngatur kerejasama, awakka Microsoft, Amazon datai ke Sarawak enggau numbuhka palan data ba ditu,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak