MANAH…Premier Datuk Patinggi Tan Sri Abang Johari Tun Openg (tiga kanan) begulai enggau Sapit Premier Datuk Seri Dr. Sim Kui Hian (dua kanan), Datuk Snowdan Lawan (kanan) enggau balai bukai mandangka tanda puji ngagai pelin Begunan Palan Main Asal Bidayuh, di Bau kemari. -Gambar RAMIDI SUBARI.

BAU: Perintah Sarawak deka numbuhka sebuah ejensi pemansang dikumbai ‘Greater Kuching Coordinated Development Agency’ (GKCDA) dikena matau projek pemansang ari luar Kuching ke Serian.

Premier Sarawak Datuk Patinggi Tan Sri Abang Johari Tun Openg madahka ejensi tu ila deka matau sereta meda pejalai projek pemansang ti diatur ba luar Kuching mungkur Lundu ke Serian.

“Pengawa ejensi tu sebaka enggau Ejensi Pemansang Bersepadu Samarahan (IRSDA).

“Nengah ejensi pemansang tu, genap projek ti dikemendarka enggau sebarang penanggul ti ayan deka ulih diputarka ba renggat ejensi nya,” ku iya.

Abang Johari bejaku munyi nya lebuh ditanya pemberita pengudah ngulu Pengerami Ngelalu Pengabang Gawai Bau 2022 di Balai Suarah Bau, ditu kemari.

Iya madahka mayuh projek pemansang ungkup raban bansa Bidayuh ba luar Kuching diatur lalu nya amat beguna dipatau sebuah ejensi ti engkeman.

Dalam jaku iya rambau pengerami, Abang Johari madahka menua Sarawak sebuah menua ti amat besai iya nya nyau deka sama pemesai Semenanjung Malaysia ke alai mesti bisi ejensi ti spesifik negapka pemansang sesebengkah palan.

“Nya alai, bisi sekeda ejensi ditumbuhka ba Sarawak baka Ejensi Pemansang Sri Aman (SADA), Kaunsil Pemansang Koridor Wilayah (Recoda) Ejensi Pemansang Ulu Rajang (URDA) enggau IRSDA.

“Aku mega bisi ninga peminta raban tuai ti minta ejensi tu (Greater Kuching Coordinated Development Agency) ditumbuhka,” ku iya.

Rambau pengerami nya mega, Abang Johari sekali agi nandu Perintah Sarawak deka nyeruri Jalai Bau Lama nyadi jalai raya begembar.

Ku iya, akses jalai raya tu ila deka diseruri ari Simpang Kuching ke Bau lalu dipelabaka nguna ungkus belanja urung RM90 juta.

Berebak enggau nya, Adun Tasik Biru Datuk Henry Harry Jinep madahka iya amat gaga ke jaku Abang Johari bekaul jalai raya enggau penumbuh ejensi nya.

“Pengawa nyeruri jalai raya deka berengkah enda lama agi tauka dipansutka tinda dalam bulan Ogos.

“Jalai nya penyauh 5.1 kilometer digaga begembar deka meri mayuh pemaik ngagai rayat di Bau.

“Kitai andalka Bau enda tinggal, lalu jalai begembar nya ila dikearapka ulih nampung penyampau perengka pengangkut enggau penguna jalai raya ti majak nambah,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak