Abang Johari (tiga kanan) begambar enggau bala bukai rambau Pengawa Nasih Tanah Palan Opis Perintah Nengeri Sarawak (Pelilih Menua Lundu) ditu kemari.

LUNDU: Jalai raya Bau lama ti mansa Siniawan deka dikemanah nyadi jalai raya begembar.

Premier Sarawak Datuk Patinggi Tan Sri Abang Johari Tun Openg madahka pekara nya bekau ari Bau nyadi palan ti ditapatka temuai baka Gua Angin enggau palan bukai ti narit ati.

“Aku bisi madah tadi, kitai deka ngemansangka sektor dagang temuai ti chakah baka muka dua buah hotel entarabansa di Sematan/Lundu nengah pemeranak puku RM120 juta.

“Tu deka meri pangka besai kelebih agi pekara infrastruktur baka jalai raya ari Bau enggau ari Petrajaya,” ku iya.

Abang Johari bejaku munyi nya ba aum media pengudah Pengawa Nasih Tanah Palan Opis Perintah Nengeri Sarawak (Pelilih Menua Lundu) ditu kemari.

Kelimpah ari gua, Abang Johari mega madahka Bau mega tebilang enggau batu kapur (limestone) ketegal batu nya ngembuan sejarah geologi.

“Pekara nya deka dibungkur pejalai lebuh orang nemuai ngagai Lundu enggau Sematan.

“Nyema orang ari Petrajaya sida ulih singah kitu keluar ari jalai raya Bau, tauka orang datai ari Bau singah ditu keluar ari jalai raya Petrajaya.

“Peluang enggau empas manah ti bisi ditu udah ulih dipeda kitai sehari tu,” ku iya.

Iya madahka, pekara ti disebut iya nya udah bisi dalam langgur Strategi Pemansang Pasca Covid-19 (PCDS 2030) bepelasarka komuniti ngerandang ngagai inovasyen. -INDUN SILONG

Suara Sarawak