MUJUR…Premier Datuk Patinggi Abang Johari Tun Openg begulai enggau Chairman Komiti Pemandu IRSDA, Datuk Abdul Karim Rahman Hamzah mandangka tanda puji. Bela dipeda Datuk Sri Dr. Sim Kui Hian, Adun ke mega menua Samarahan ba Pengerami Bejadika IRSDA di Kuching, kemari. -Gambar GHAZALI BUJANG

KUCHING: Perintah Sarawak deka ngaga jalai raya begembar ari Samarahan ngagai Sebuyau.

Premier Sarawak Datuk Patinggi Tan Sri Abang Johari Tun Openg madahka pejalai pengawa ngaga jalai raya begembar tu berengkah ari Serian neresa Gedong nuju Samarahan enggau Sebuyau.

“Jalai raya ari Serian tu bisi dua iti chara baikka ngemesaika jalai raya nuju Gedong ti udah bisi diatu, tauka ngaga jalai raya ti baru ngagai Gedong.

“Udah nya, jalai raya ari Gedong deka besambung nuju Samarahan ke alai jalai raya begembar ari Samarahan deka datai ba Sebuyau,” ku iya.

Abang Johari bejaku munyi nya rambau program Bejadika IRSDA ba sebuah hotel ditu kemari.

Ku iya, jalai raya begembar ti deka digaga tu enda dipejalaika ba baruh IRSDA tang ditambah iya empu ke pemaik rayat.

“Nya alai, kitai engka bisi agi ngaga jematan laban jalai raya ti digaga nya begembar. Jalai raya nya ila kira baka Jalai Raya Pan Borneo ti tama ke Gedong terus ke Samarahan lalu terus ke Sebuyau.

“Ari Sebuyau, jalai tu deka besambung nuju Ejensi Pemansang Sri Aman (SADA),” ku iya.

Abang Johari madahka, projek nya deka ngasuh jalai raya ti ditengah mensia mayuh besai agi nyengkaum pejalai nuju ke Sibu.

“Pekara tu deka ngemajuka genturung besemak laban sida mega deka napi arus pemansang ti diatur perintah,” ku iya.

Suara Sarawak