SIBU: Opis Menteri Kereja Raya (KKR) minta mensia mayuh kompelin pasal kandang jalai raya ti rusak dikena nentuka pengawa nyeleti jalai dipejalai lengkas sereta nyaga pengelikun penguna.

Menteri iya, Datuk Seri Fadillah Yusof madah, kerejasama ari penguna jalai alun beguna amat baka meri penerang bekaul penanggul ngambi ulih diputar enggau lengkas.

“Tu pengawa dipejalai kami ba opis menteri, kami nyendiaka laman ngagai penguna kompelin nadai ngira penanggul sekalika nya bekaul jalai alun, kitai ulih nganjung kompelin nya ngagai ngagai kami.

“Nya kebuah, kita ulih nerang pasal kompelin nya enggau silik ngagai ejensi bekaul,” ku iya.

Fadillah mansutka jaku nya ba Pengerami Makai Lemai Program FTRoadpedia KKR 2022 Jalai Besai Pan Borneo ba sebuah hotel tebilang di Sibu, kemari.
Ku iya, bisi tiga bansa jalai ke dikumbai jalai besai, jalai nengeri enggau jalai kaunsil.

Ku Fadillah, semua jalai nya diaduka tiga raban bebida enggau jalai besai di baruh tanggung pengawa Opis Kereja Raya (JKR) Malaysia seraya jalai nengeri dipatau Perintah Sarawak enggau kaunsil mengeri tauka kaunsil pelilih.

“Tiga jalai tu bisi kod pengelala kediri, nya kebuah enti ngaga kompelin jalai nya ulih diseleti jampat sereta JKR Malaysia enda saru pasal pengawa ke patut dikereja.

“Tang suah amat lebuh bisi isu jalai jai, Menteri Kereja Raya ke deka ditanya, dipejah dulu nadai ngira kategori jalai nya.

“Nya alai, dalam kes baka tu beguna amat mensia mayuh ngaga kompelin nengah laman kompelin ti udah disediaka KKR,” ku iya.

MATAU PROJEK… Fadillah begambar ungkup kenang enggau staf JKR pengudah matau pejalai Projek Jalai Besai Pan Borneo.

 

Suara Sarawak