JKM, Adun Engkilili ngabas Rh Polly, Bukong Asal seraya nganjung bantu

BETONG: Peranak Rumah Polly Sulau, Bukong Asal ke dituntung penusah angus empai lama ke udah nerima bantu sepenyampau RM72,900 ari Opis Pengintu Pengelantang Mensia Mayuh (JKM).

Nitihka penerang ari Palan Servis Rayat N.33 Engkilili madahka Adun iya, Dr. Johnical Rayong Ngipa sama enggau ngabas peranak rumah panjai nya pagi kemari.

Ba penemuai ngabas peranak rumah panjai nya, Rayong diberi basa nyuaka agih belanja ke nyampau RM55,000 ari JKM kena mantu sida Polly serumah bebelika perengka dikena ngaga rumah.

“Berebak enggau nya, Rayong mega bela diberi basa nyuaka bantu bukai nyengkaum bantu pemakai, gari dikena ninting hari, gari uniform enggau kereban sekula, perengka tinduk, perengka dapur enggau duit belanja ke nyampau RM17,900 ngagai peranak rumah panjai nya.

“Arapka bantu nya ulih ngelempungka tating belanja sida Polly serumah pengudah rumah panjai sida dituntung penusah angus,” ku penerang nya.

Opis Pengerai Pelilih Betong mega bela mantu ngaga agu dampa kena nentuka pemeresi peranak rumah panjai nya.

Penerang nya mega madahka Rayong meri besai terima kasih ngagai semua sida ke datai meri bantu ngagai sida Polly serumah nemuka nya disua terus tauka enda.

Penemuai Rayong ngagai rumah panjai nya disempulang sekeda raban ari ejensi perintah nyengkaum ari Opis Pengintu Pengelantang Mensia Mayuh (JKM) Betong, Opis Pengerai Pelilih Betong, bala veteran ATM Pelilih Betong enggau bala tuai rumah Lidong Skrang.

CHUKUP SINU…Rayong ngabas tembawai Rumah Polly, Bukong Asal ke dituntung penusah angus empai lama ke udah.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak