PROF DATUK MOHD FADZIL

KUCHING: Juluk ati Kaban Parlimen Puncak Borneo Datuk Willie Mongin deka masuk parti komponen Gempung Parti Sarawak (GPS) sigi udah diperagam, ku Pemikir Politik Profesor Datuk Mohd Fadzil Abdul Rahman.

Ku iya, nya siti pengawa ti nunjukka Willie agi keran ngetanka penuduk parlimen iya ba Puncak Borneo ti diempu iya sebedau tu.

“Berebak enggau nya, iya (Willie) nadai jalai enti GPS bediri ba penuduk nya laban parti tu mega udah madahka deka bediri ba semua penuduk parlimen di nengeri tu,” ku iya lebuh ditanya Suara Sarawak apin lama.

Ku iya, nyema GPS meda Willie sebagi ari aset ngagai parti enggau ngira iya siku chalun ti ulih menang ba penuduk sereta diterima dalam parti nyengkaum pengundi pekara nya deka nyadi siti pengelebih ngagai iya.

“Tang enti nya ngasuh orang dalam GPS pambar engka udah bisi chalun ti deka disabung bediri ba sitak nya (Parlimen Puncak Borneo) nya udah tentu deka nyadi liabiliti ngagai peluang orang dalam Pengawa Bepilih Besai (PRU) ila ngujungka peluang nya deka bisi besibil.

“Nya alai, tepulai ngagai raban tuai GPS meratika semua pemutus bekaul peminta Willie nya,” ku iya.

Sebedau tu Willie ngenukuka iya udah nganjung peminta nyereta sebuah parti GPS.

Ku Fadzil, tanda tanya ti pemadu besai iya nya ulih ke enda Willie narit ati bala pengundi ba sitak nya enti iya nyereta parti menua? Willie dipilih sebedau tu bepelasarka parti tauka pengering iya empu?

“Ba penemu aku deka bisi ayan isu ngagai bala chalun GPS enti Willie diterima tama ngagai komponen parti GPS.

“Pia mega, GPS sebedau tu bisi madahka sida enda deka nerima chalun ti merejuk parti. Nya alai, pekara nya mesti diperundingka.

“Dalam pekara tu, aku meda GPS mesti pintar ngatur pekara nya dikena nentuka jeman ke mua parti rambau PRU ti deka datai kelebih agi sitak Puncak Borneo,” ku iya.

Willie ti mega Sapit Menteri Pengawa Bekebun enggau Komoditi ll kala nyereta Parti Keadilan Rakyat ari taun 2010 nyentuk 2020 taja pia iya keluar ari parti nya lalu nyereta Pribumi Bersatu Malaysia (Bersatu) ari 2020 nyentuk diatu.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak