NERANG…Abang Johari (tiga kiba) bejaku aum media pengudah Pengawa Nasih Tanah Palan Opis Perintah Nengeri Sarawak (Pelilih Menua Lundu) ditu kemari.

LUNDU: Perintah Sarawak bisi berunding deka ngatur kerejasama enggau menua Indonesia dalam pengawa nanam kayu bakau enggau nyimpan gis karbon di Pulau Borneo.

Premier Sarawak Datuk Patinggi Tan Sri Abang Johari Tun Openg madahka iya udah berandau enggau Konsulat Jeneral Indonesia bekaul kerejasama nya.

“Sitak ditu ngembuan Kampung Paya Bakau (Ramsar) di mua Sematan, Sempadi iya nya ari sitak Pantai Damai dikumbai Sungai Telaga Ai enggau Sungai Salak lalu terus ngagai sitak tu.

“Nya kebuah, tu siti ari pekara ekonomi sistem paya bakau ti patut dijaga kitai ba baruh Ramsar,” ku iya.

Abang Johari bejaku munyi nya ba aum media pengudah Pengawa Nasih Tanah Palan Opis Perintah Nengeri Sarawak (Pelilih Menua Lundu) ditu kemari.

Ku iya, pekara nya deka nyadi kelai ti terang ngagai dunya sereta pangka ekonomi dalam pengawa ngintu rampa menua.

“Paya bakau tu mega siti ari pengawa kitai ngatur pansik ukai semina ari sukut karbon tang guna kayu bakau empu sereta utai tumbuh bukai nyengkaum pun apung.

“Nya kebuah perintah numbuhka sebuah kaunsil dikumbai Kaunsil Pemansang Mulung enggau Apung.

“Kaunsil tu ti deka nyaga palan bakau di pesisir tasik laban nya ngembuan peluang besai ngagai penatai pemisi menua,” ku iya.

Ku Abang Johari, penatai pemisi menua ti ulih diasilka nya nyengkaum produk ari kayu bakau empu enggau projek nyimpan karbon.

“Tu deka meri penatai pemisi ti besai ngagai kitai seraya sukung perintah dalam ngintu pengawa nanam bakau ba palan pesisir pantai ari Kuching ke Lawas,” ku iya.

Suara Sarawak