TERIMA KASIH… Andy (empat kiba) nerima chek penyampau RM100,000 ari Abang Johari (empat kanan) enggau RM50,000 bela ari Shell, Petronas enggau SEB ba penemuai basa FSJA ngagai Premier Sarawak, kemari.

KUCHING: Premier Sarawak, Datuk Patinggi Tan Sri Abang Johari Tun Openg disadang deka ngerichahka agi Pengerami Anugerah Pemberita Kenyalang (KJA) 2022 diatur kena 9 Disember tu di Imperial Hotel, Miri.

Gerempung Raban Pemberita Sarawak (FSJA) betuaika Presiden FSJA Andy Jong Wan Joon begulai enggau pengari tiga pemelanja emas KJA 2022 iya nya Shell, Petronas dan Sarawak Energy Berhad (SEB) ba Wisma Bapa Malaysia, Petra Jaya, kemari.

Ku Andy, pengawa masuk KJA 2022 deka dibuka kena 1 Julai tu seraya artikel ke tau dianjung nya bepun 1 September 2021 nyentuk 31 Ogos 2022 lalu deka ditutup kena 9 September tu.

“Taun tu, raban pengatur (FSJA) udah ngaga pemutus ulih ngambi pom online ungkup penyereta ke deka nganjung ‘soft copy’ nengah ‘cloud storage’.

‘Penyereta mega ulih nganjung ‘hard copy’ nengah chara pos terus ngagai adres Malaysia Press Institute (MPI).

“Pom online ulih diambi ba website MPI bepun 1 Julai tu,” ku iya nerang.

Bisi 11 kategori mengkang ditetapka ba KJA 2022 iya nya Anugerah Kewartawanan Kesejahteraan Komuniti, Anugerah Laporan Kelestarian, Anugerah Laporan Ekonomi dan Perniagaan, Anugerah Kewartawanan (Rencana dan Penulisan Berita) enggau Anugerah Laporan Berita.

Pia mega, Anugerah Berita Sukan, Anugerah Ekonomi Digital, Anugerah Kewartawanan Penyiaran, Anugerah Kewartawanan Foto, Anugerah Esei Foto sereta Anugerah Premier Sarawak ke nyendiaka perais mata duit penyampau RM250,000.

Ba penemuai nya, Abang Johari udah nyuaka chek penyampau RM100,000 ari Perintah Sarawak naggai FSJA ke mega pemelanja besai KJA kenyau ari taun 2015.

Pia mega, Shell, Petronas enggau SEB meli ngagihka belanja RM50,000 ungkup pengerami besai nya.

Sama datai Menijar Besai Kaul Perintah-Shell, Jonathan Jolly, Menijar Kaul Media Petronas Sarawak Johannes Ridu, Menijar Besai Komunikasyen Korporat SEB Peing Tajang, Sapit Presiden FSJA enggau mega Penyanding Penemu Gerempung Pemberita Bagi Menua Kuching (KDJA) Jacqueline Radoi David sereta pengari bukai ari FSJA, Shell, Petronas Sarawak enggau SEB.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak