ARAP TERUS MUJUR… Premier Datuk Patinggi Abang Johari Tun Openg nyuaka degree ngagai Allen Chong Chieng Hoon nyerumba Pengerami Konvokesyen Komemoratif UNIMAS 2022 di Kota Samarahan kemari.-Gambar GHAZALI BUJANG

KOTA SAMARAHAN: Sarawak patut meri rega tambah ngagai pengeraja asal ti udah bisi awakka ulih meri penatai pemisi ti mayuh agi ngagai menua tu.

Premier Sarawak Datuk Patinggi Tan Sri Abang Johari Tun Openg madahka, apin lama Perintah Sarawak nengah Kaunsil Pemansang Ekonomi Sarawak (SEDC) udah nyain sempekat enggau raban pemeranak puku ngaga sebuah loji di Bintulu ungkup tuju nambahka rega pengeraja menua ari proses evakuasyen gis tulin ti tebal agi enda dikemansangka agi ba luar pantai Sarawak dikumbai ‘sourgas’.

“Projek tu deka nyendiaka 200 peluang pengawa puang ngagai sida ti bepenau dalam bidang injinir kimia.

“Pia mega, pengawa nya deka nyendiaka 400 agi peluang pengawa puang ba sukut servis di loji ngubat ‘sourgas’,” ku iya.

Abang Johari bejaku munyi nya rambau Pengerami Kovokesyen Komemoratif Unimas di Dewan Tunku Abdul Rahman Putra (DeTAR Putra) ditu kemari.

Ku iya, Sarawak bisi ngembuan penatai ai ti mayuh ti udah meri rega tambah ngagai penumbuh tekat hidro di Batang Ai, Bakun enggau Murum.

“Lebuh Tekat Hidro Baleh tembu enda lama agi Sarawak deka ngembuan penatai kuasa ti ulih dikemaru besai agi ukai semina ungkup nengeri tu aja tang ulih diberi ngagai menua bakih,” ku iya.

Iya nangkan nya madahka naka diatu Sarawak udah meri kuasa nya ngagai menua Kalimantan Barat lalu udah bisi berunding enggau menua Sabah bagi tuju ti sama.

“Aku pechaya, bisi maya ila kuasa karan ari Sarawak deka ulih diberi ngagai Singapura ti udah nunjukka minat sida ngagai kuasa karan ari menua kitai,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak