KUCHING: Sarawak mesti nyapai 60 peratus nembiak bepengelandik dalam bidang Sains, Teknologi, Injinir enggau Matematik (Stem) manggai taun 2030, ku Menteri Pelajar, Inovasyen enggau Pemansang Penau (MEITD) Datuk Roland Sagah Wee Inn.

Ku iya, naka diatu semina 30 peratus nembiak ba Sarawak rejister dalam pakej Stem kenyau ari ditumbuh dalam taun 2017.

Nya kebuah ku Sagah, opis menteri iya udah bejalaika bemacham inisiatif ngemansangka Stem di Sarawak nyengkaum Program Roadshow Bakih Astronomi enggau Stem Playground.

Pia mega ku iya, sida mega bekerejasama enggau palan pelajar tinggi perintah (IPTA), institusyen pansik, sekula, mensia mayuh enggau sektor peribit (IPTS) nyengkaum gerempung ukai dikuasa perintah (NGO).

“Nipakka Strategi Pemansang Lepas Covid 19 (PCDS) 2030, MEITD deka terus bejalaika polisi enggau undang-undang bekaul pelajar digital, latih enggau nambahka pengelandik ungkup peluang kereja,” ku iya.

Sagah mansutka jaku nya lebuh bejadika Pengawa Nutup Simposium Entarabansa Pasal Transfomasyen Industri Digital di Centexs, ensanus.

Sagah madah, opis menteri iya mega udah bejalaika bemacham inisiatif nyengkaum numbuhka Palan Sains Sarawak nyadika pelasar narak minat pasal sains enggau teknologi ungkup pelajar Stem lebih agi entara rebak biak enggau mensia mayuh di Sarawak.

“Sarawak tu kaya enggau bemacham utai tumbuh enggau jelu sereta nyadi entara palan biodiversiti dunya.

“Kami ngarapka Palan Sains Sarawak deka nyadi pelasar belajar nengah eksibisyen nentuka nembiak ulih nyerungkai penemu sains enggau aktiviti fizikal,” ku iya nerang.

Nangkan nya, Tuai Pegawai Eksekutif Centexs, Syeed Mohd Hussein Wan Abdul Rahman madah, Centexs dikeandal ulih nyendiaka penau besai dikena nambahka pengelandik digital enggau industri ungkup Sarawak.

Ku iya, pekara tu nengah kerejasama Centexs enggau Huawei, Eon Reality, Keysight Technologies, Bosch Rexroth, IBM sereta NExT Schlumberger.

“Kami ngarapka penumbuh Centexs deka mantu nangkup peminta lebuh matih enggau nambahka pengelandik nembiak dikena nangkup peminta digital enggau teknikal nyengkaum peminta industri Sarawak,” ku iya.

NYERUNGKAI PENEMU SAINS… Sagah bejaku beserimbai enggau Pengawa Nutup Simposium Entarabansa Pasal Transfomasyen Industri Digital di Centexs, ensanus.

Suara Sarawak