NEMBIAK REGAS…Henry nyuaka perais ngagai siku nembiak ke teulihka pemujur ba program lumba nya.

BETONG: Nembiak sekula deka lebih lati ba sekula enti pengeregas ari sukut runding, tubuh enggau pengarap bela dikemeran, ku Henry Jugah.

Chairman Serakup MRSM Betong nya madahka, tubuh enggau runding ti bepengerai deka ngelancharka agi kitai mensia kelebih agi raban nembiak besekula begigaka pemandai sereta ngereja bemacham pengawa.

Henry mansutka jaku tu lebuh iya diberi basa nutup Pengerami Lumba MRSM Betong Ke-7 ti diatur ba Kompleks Lumba enggau Main Betong lemai ensanus.

Ku tandu iya, MRSM Betong dekaka semua nembiak ke belajar ba palan tu sebela ari sukut pelajar enggau mega pengawa lumba.

“Dalam lumba tu, udah meri ruang enggau peluang ungkup bala nembiak ngayanka pengelandik sereta pengelebih diri empu.

“Pia mega, pengawa lumba ti diatur MRSM Betong tu ulih nyadika palan alai milih raban nembiak ke bisi penau dikena ngarika MRSM tu ba pengawa lumba ti deka diatur Opis Pelajar Pelilih Menua Betong enggau Unit Pelajar Menengah Mara,” ku Henry.

Iya mega ngarapka semua raban dalam MRSM Betong ulih meretika tuju (falsafah) enggau asil ari lumba tu ti ukai semina lumba ninting taun aja.

Tang ku tandu Henry, program lumba tu ulih diangkatka nyadi sebengkah pengawa belajar ari luar kelas ti penuh enggau semangat bekerejasama sereta besemekih enggau chara ti manah.

Henry ti mega siku ari Pemesai Bomba Betong muji chara raban nembiak ba MRSM Betong ti ngembuan juluk ati deka ngulihka gelar champion ba genap lumba ke dipasuk.

“Tu mih pekara ti pemadu manah ti diayanka raban nembiak ke besekula ba endur tu lalu arapka semangat ke bakatu deka terus bisi ba dalam diri sida iya ambika sida iya mega ulih tejapaika juluk ati ba pengidup sida iya jemah ila.

“Enggau reti jaku bukai, sesebengkah utai endang enda ulih dikereja enti enda digaga enggau pengeliat ati sereta mega asil ke dudi hari ila deka ngasuh kitai lantang,” ku Henry.

Ba dalam jaku iya mega, Henry meri jaku puji ngagai MRSM Betong ti udah mujur ngatur pengawa lumba ungkup ke taun tu sepengudah dua taun lumba tu diketuka ketegal pengerekai igi penyakit Covid-19.

Dalam lumba tu, Rumah Mirah udah teulihka gelar champion lalu Keanetth Kanyan Linggang ti baru Pom 5 udah mechahka rikod lama ba main nikauka sangkuh.

Penyauh sangkuh ti ditikauka Keanetth iya nya 34.6 meter ti udah madamka rekod lama ungkup lumba tu 33.0 meter.

Sama bisi datai lebuh pengawa nutup lumba tu iya nya Prinsipal MRSM Betong Ramlah Salleh, Sapit Prinsipal Unit Pemansanga Pelajar Hafizan Mohd Hassan, Sapit Prinsipal Unit Pemansang Nembiak Abdul Halim Mohammad, Koordinator Lumba MRSM Betong 2022 Hafizuddin Mohamad Ramli, raban apai indai nembiak sereta bala nembiak ke besekula dia.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak