NYULUT…Nitihka statistik Penegap Orang Indu dalam Domain Tepilih, Malaysia 2021 raban orang indu lebih nyulut ari lelaki. Gambar mandangka raban orang indu ke bisi ngulu Gempuru Besai Komiti Nembiak enggau Orang Indu PBB ke-15 di Palan Aum Borneo Kuching (BCCK) ditu, ensana. -Gambar GHAZALI BUJANG

KUCHING: Penyulut orang indu dalam bidang pelajar ngelui 1.071 ari orang lelaki nitihka Statistik Penegap Orang Indu dalam Domain Tepilih, Malaysia 2021.

Menteri Pemansang Orang Indu, Anak Mit enggau Pengintu Pengelantang Komuniti ti mega Tuai Orang Indu PBB Datuk Seri Fatimah Abdullah madahka skor 1.0 nunjukka tikas penyulut sebela (peluang enggau ngambi bagi) entara indu enggau lelaki.

“Rikod tu manah sereta ulih nyadi pengering ti patut nyadi reta nyemelaka semua bidang pelajar ti dipilih awakka ulih nambahka peluang makit sida ngagai dunya pengawa.

“Ba dalam domain tepilih ti bukai baka politik, ekonomi enggau pengerai, statistik tu nunjukka agi bisi takah penyulut orang indu enti dibanding orang lelaki ba Sarawak,” ku iya.

Fatimah bejaku munyi nya rambau Gempuru Besai Komiti Nembiak enggau Orang Indu PBB ke-15 di Palan Aum Borneo Kuching (BCCK) ditu, ensana.

Ku iya, orang indu agi napi takah skor kurang ba politik (0.120), kaul ekonomi (0.714) enggau pengerai sereta pengidup (0.947).

“Sedar enggau takah sebela ti besai dalam domain kuasa politik enggau peluang sereta dalam ekonomi, kami minta perintah ngambi atur ti konkrit ngerapitka takah nya.

“Pengawa tu beguna dikena nentuka orang indu ulih ngatur pengawa ti chakah enggau meri bantu ngagai pemansang sosioekonomi Sarawak,” ku iya.

Suara Sarawak