NERANG… Karim nyaut tanya pemberita pengudah bejadika “International Friendship Pathway” di Lundu Town Square beserimbai enggau Pekit Final Miss Tourism International (MTI) 2022/2023 di Town Square, Lundu, kemari.- GHAZALI BUJANG.

KUCHING: Pemutus nerima Kaban Parlimen Puncak Borneo Willie Mongin masuk Parti Pesaka Bumiputera Bersatu (PBB) bepanggai ngagai presiden enggau supreme kaunsil parti nya, ku Datuk Seri Abdul Karim Rahman Hamzah.

Mandal Presiden PBB nya madah, sida enda ulih ngenggaika Willie udah menang lebih 4,000 majoriti sebedau tu.

“Tu mai reti iya (Willie) dikerinduka rayat enggau ulih ngalahka chalun Gempung Parti Sarawak (GPS) ba sitak nya. Nya kebuah pekara baka tu mesti diperunding.

“Ari tiga chalun dalam GPS sebedau tu, siku ari sida kala ngelaban kami tang kami mega nerima sereta ulih nelebaka diri enggau ubah nya.

“Nya alai, nama kebuah orang bukai enda ulih nelebaka diri enggau ubah nya mega,” ku iya.

Karim mansutka jaku nya pengudah bejadika “International Friendship Pathway” di Lundu Town Square beserimbai enggau Pekit Final Miss Tourism International (MTI) 2022/2023 di Town Square, Lundu, kemari.

Nambahka nya ku iya, PBB mesti berundingka Willie kala nyukung GPS lebuh Pengawa Bepilih Nengeri Ke-12 (PRN-12) lebuh meri awak ngagai PBB bediri ba ketetiga sitak di baruh Puncak Borneo.

Berebak enggau nya, lebuh ditanya sekalika sida nerima Willie masuk PBB deka nyukung budaya merejuk parti, Abdul Karim ngenggaika pekara nya.

“Ukai baka nya laban nadai utai dipinta dalam parti, munsuh udah nyadi kaban lalu pekara tu udah kala nyadi suba,” ku Karim.

Ku Karim, parti nya bisi chara kediri empu ngaduka peminta nya lalu sida deka beratika pekara nya ba semua sukut.

“Supreme kaunsil mesti ngaga pemutus pengudah bulih timbal ari ketetiga Adun di baruh sitak Puncak Borneo iya nya Miro Simoh (Serembu); Datuk Roland Sagah Wee Inn (Tarat) enggau Datuk Dr Jerip Susil (Mambong).

“Nya alai, kitai mesti berunding enggau sida lalu sekalika sida deka nerima tauka enda enggau ngumbai nya liabiliti.

“Supreme kaunsil enggau ketuai mega mesti berundingka pekara tu ari sukut nya,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak