TEMEGAH ATI…Raban nembiak MRSM Betong begambar kenang bebala mayuh sepengudah nerima pemutus peresa SPM 2021 lemai kemari.

BETONG: Maktab Rendah Sains Mara (MRSM) Betong udah mujur teulihka pemutus Setipikit Pelajar Malaysia (SPM) 2021 ke chukup manah.

Prinsipal MRSM Betong berasai temegah ati meda pemutus nya laban Gred Purata Maktab (GPM) ke taun tu chukup manah ti dibandingka enggau taun nyin kemari.

Ku Prisinpal sekula nya, Ramlah Salleh madahka, ungkup taun 2021 GPM iya nya 2.581 ti dibandingka enggau taun 2020 suba semina teulihka 2.706 aja.

“Aku chukup gaga enggau pemutus SPM ungkup sekula kami ke taun tu ti nunjukka sekula tu semakin teulihka pemujur ba peresa.

“Terima kasih ngagai Chairman Serakup MRSM Betong Henry Jugah, raban Komiti Serakup MRSM, bala pengajar sereta bala apai indai nembiak ti udah meri kerejasama ngelamatu.

“Enggau sukung sereta mega bantu ari mata duit udah ngelempungka tanggungpengawa kami ditu ngajar bala nembiak.

“Pia mega terima kasih ke sampi ari kita semua ti deka meda pemujur bala anak kitai ke besekula ditu lalu kediatu udah nyata,” ku Ramlah.

Sama mansutka jaku mega iya nya Henry Jugah ti madahka pengaga ati diri ke penyulut raban nembiak ba MRSM Betong ba peresa SPM tu tadi.

“Aku chukup gaga meda pemujur sida iya ba pemutus peresa ti udah dibantaika lemai kemari sereta mega meri pengaga ati ngagai bala pengajar enggau apai indai ba pemujur bala anak.

“Arapka pemujur ke baka diayanka seharitu, mesti diteruska ka jemah ila ambika ngangkatka nama MRSM Betong tu tinggi agi,” ku Henry.

Ke penerang, semilan iku nembiak besekula ba MRSM Betong udah mujur teulihka A penuh ba subjek sida iya dalam peresa SPM 2021 tu tadi.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak