BALA lemambang nimang jalung ba Gawai Antu rumah panjai Tunggal di Debak urung taun 1998 suba.

Pengerami Gawai Antu nya atur pengawa ti pemadu besai ba raban bansa Iban. Iya kena merantu orang ke udah parai ninggalka dunya injau kitai tu.

Taja pia, ukai semua menua ngena jalai ti sama nirika gawai tu.
Tu laban mayuh menua mina niri gawai nya nempegal sepintu bilik aja.

Tang di menua batang Krian enggau Saribas Gawai Antu tu dintu orang serumah nya lalu bisi mega sebuah rumah panjai nya ngintu gawai nya takah ngagai 30 taun baru ngintu sekali.

Atur pengawa ke amat ngerinduka ati ba siti-siti Gawai Antu nadai lebih ari enggau orang bejalai betunda undi bebala mayuh tauka semina meda orang ke Ngalu Petara.

Tu meh maya bala indu dara pansut ngena ngepan indu kitai Iban, lebuh sida ke bejalai niti rumah sama enggau bala bukai sereta mega bala raban lemambang ke nimang jalung.

NIANG Lemambang Dundang Enchana @ Apai Aling maya nimang jalung di Ulu Bayor, Rimbas, Debak dalam taun 1988.

Nyau richah munyi dauh burung pilin munyi duit tating kain bala sida indu bepangka.

Lalu udah tembu ngalu petara lemambang lalu belabuh nimang baru nyentuk ka sida nembuka timang enggau tuntung jalung.

Nyadi sida nuntungka jalung nya kira belabuh ari pukul tiga dini hari. Nyadi tu utai siti ke ngerindu bendar ati, laban nya maya orang nuntung bujang berani.

Kebuah pia, semina orang ke udah bedengah enggau orang ke aris tau ngirup jalung ulih diambi nembu pengawa ngirup jalung tu.

Tu meh maya lemambang lalu nanya ensumbar bala sida ke makai jalung nya. Ensumbar tauka gela tu mai mayuh reti ke belalai, tauka cherita lalai.

Tebal agi sida ke bisi ensumbar nya endang orang ke udah bulih dengah munuh munsuh, taja pan bisi sekeda nya bulih dengah ba kaki tangga.

Reti tu, sida ukai bedengah ka munsuh tang udah ampit basah jari. Bisi nya udah munuh orang lebuh ke belaya, bisi mega nya udah munuh orang beduduk ari kebuah bukai.

Amat meh Gawai Antu tu jarang agi didiri diatu, tang setiap kali bisi gawai nya didiri orang ke ngirup jalung nya sigi agi beguna.

Nya kebuah ba menua batang Krian enggau Saribas sigi agi bisi orang ke ulih ngirup jalung enggau ngirup buluh kena nembu ka Gawai Antu.

Pengingat Gawai Antu di Sungai Klampai

Nyadi lebuh Gawai Antu ba rumah panjai Sungai Klampai di Saratok kurang lebih dalam taun 1970 menya, endang sigi agi mayuh sida ke diambi ngirup jalung nya orang ke udah bedengah.

Nyadi lebuh nya siti raban ke nimang jalung nya bala sida aya aku Dundang anak Enchana @ Apai Aling (diatu udah niang). Iya matak jalai nyadi ketuai bala lemambang ari Melupa.

Nyadi lebuh nya rindu amat ninga sida ke nimang, kelebih agi lebuh sida ke nuntungka jalung ngagai bala pungka laki ke ngirup jalung.

Orang keterubah ngirup jalung kena tuntung lemambang Dundang iya nya niang Tindin a.k.a Apai Gawing, sida ari Mendas. Tuntung nya munyi tu:-

“Lama kitai ke besaruk duduk bebanding. Ku lama udah ninga gela nuan unggal dedarah sawa indu tedung, ba arung jalai pemuntang. Oh sapa perinyai ambai sulu sangkung lebuh jawing agi gegayang gamal gegandung, alai tangan tunjuk ujung nuan tau dinjau orang nyulukka upung nyiur nyintung tak lepung-lepung mesai tempulung lang tansang, oh ku aku tansang lang.”

Udah nya tadi Tindin lalu nempap tikai madah ka ensumbar diri ‘Pipit Manchal Menua Ili, Gelumbang Mechah Ari Jai’. Nyadi niang Tindin menya siku orang ke bagak sereta jegak lalu suah udah dambi ngirup jalung ba batang Krian enggau Saribas.

Udah nya lemambang Dundang lalu nuntung ka jalung ngagai siku agi pungka laki ke ngirup jalung ba ruai orang nya, iya nya Taboh anak Tilang sida ari Batu 4 Jalai Lama Roban/Saratok enda jauh ari rumah orang ke begawai nya. Nyadi tuntung Dundang a.k.a Apai Aling munyi tu:-

“Oh…lama lemai kitai ke besaruk duduk berintai, lama udah aku ninga
gela nuan ke bedarah sama tedung tendai, entang ke tu lebuh kitai ke
bejaku kelulu nyampau dirintai, kali jenti nuan udah bebini, tang lebih
ka gayang gamal lelempai, sapa ambai tulang peransang…iya ku aku
peransang tulang..oooh”

Dia Taboh pan lalu madah ka ensumbar diri ‘Pemalu Batang Buan, Pengirit Menua Batu Enam’.

Bala sida ke indu berintai bejalai niti ruai ngena ngepan.

Sepengabis tuntung ngagai Taboh dia Dundang pan lalu nuntung unggal Anthony Lawai, ke lebuh nya agi mengkang nyadi pengajar be sekula primary.

Pengajar Lawai tu orang ke jegak sereta pemanas tang siru sereta nadai mentas begulai enggau orang.

Nyadi lebuh ke dituntung ulih lemambang Dundang ba gawai nya, pun tuntung nya munyi tu:-

“Jadi aku deka nanyaka ensumbar sida bujang mereti aya tedi ke
berani ati tunggang changka. Tadi aku nanya ka ensumbar unggal aku
Lawai jadi master ke begela dua dama….”

Saut Anthony Lawai madahka iya bisi dua iti ensumbar. Reti nya iya udah bulih dua dengah. Ensumbar iya ke terubah nya ‘Unsut Insai Baruh Batu’ lalu iya ti kedua nya ‘Lalang Layu Ulu Sarikei’. Diatu Lawai pan udah midang mega.

Udah nya Apai Aling lalu nuntung niang Nyawin anak Merdan a.k.a Apai Enduh bala kami ari Kedap dalam Melupa.

Nyawin tu menya udah ampit enggau orang nyadi polis ba pasar Bau. Iya tu landik ngajat, kering sereta nelap. Nyadi pun tuntung Apai Aling ngagai iya munyi tu:-

“ Nya alai sapa dama ambai nuan bujang besai ke lelempai tubuh memelan.
Aku meda jari kiba nuan endang bisi becherengga pansa darah Iban.
Nya alai aku tu endang nemu nuan amat berani ati tunggang tajam,
tang aku enda nemu gela ensumbar nuan. Tang enti enda berani ati
tunggang tajam, bula orang ke madah nuan nyuluk tandan nyiur bulan, tak
melan-melan sadau, gagang deh labuh iya…oooh, ku aku labuh gagang…oooh.”

Ninga munyi nya, nyau meletup tempap tikai niang Nyawin menya lalu madah ensumbar diri ‘Lambur Mandang Punggang Menua, Api Nyadi Pasar Buso’.

Siku agi ti kena tuntung Apai Aling nya Jerampang anak Saat ari Assam, Melupa. Nyadi pun timang tuntung Apai Aling munyi tu:-

“ Aku nemu nuan tau makai ai ginjai sida ke parai sulai pumpung,
aku ninga nuan tau ngirup rakup buluh betung, nya endang bagi sida ke bebadi sulai lindung. Nya alai ti udah munyi tu nama gela alai nuan tau kereja nya, kedua agi ngirup ai garung, siti ke beranggung tunjung mayuh iya..oooh
mayuh betunjang…ooohh.”

Jerampang lalu tekala nya nyaut madah ka ensumbar diri ‘Pintu Batu Nanga Igan,
Indu Balu Ditemu Jauh Malam’. Jerampang @ Apai Naya menya endang orang ke chukup penegap, tinggi, bagak sereta mega siru pendiau. Iya ukai semina ngirup jalung tang mega udah suah enggau orang ngirup buluh, iya nya segigi tinggi ari sida ke ngirup jalung.

Ka penudi iya Dundang lalu nuntungka jalung ngagai Bandang anak Kasa, sida ari Kelua ba Batang Krian. Bandang madahka gela diri ‘Labu Rendam Puak Kerapa’.

Munyi ku jalai tuntung timang lemambang nya tadi, orang ke udah bedengah nya enda chechamang madah ka ensumbar diri.

Sida ke madah diri ngirup jalung nya ukai tegal bisi dengah, tuntung timang lemambang bisi lain mimit.

Nyadi enti orang ke ngirup jalung nya bebula madah diri udah bedengah, lemambang ke changka baka niang apai aku Salok Jembu tau ngena ‘tuntung sumpah’ ke tau ngujung ka pemati orang ngirup jalung nya ketegal iya udah bula.

Nyadi sepengelama niang apai enggau orang nimang jalung, iya udah ngena tuntung sumpah dua kali. Seduai nya sama nyau mati dua-tiga bulan udah bekau ke ngirup jalung ba gawai nya.

Nyadi semua bala lemambang enggau sida ti ngirup jalung disebut ditu udah ninggalka dunya injau tu magang. Penulis ngelala semua orang ti dituntung nya.

Niang pengajar Anthony Lawai menya rindu amat enggau begulai laban iya kala ninga licha penulis lebuh ngambi kus ungkup bala ‘Penulung Kanan Sekula Primari’ ba siti palan (hotel) di Kuching ditu urung taun 1988 suba.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak