NERANG…Len Talif (tengah) bejaku ba aum media pengudah bejadika pengawa nyuakka Gazet Rizab Komunal Bumiputera ba baruh Seksyen 6 Kanun Tanah Nengeri (KTN) bagi Kampung Bangka Semong enggau Surat Pala Tanah Seksyen 18 KTN (Betanam Betupi/Berumah) bagi Kampung Tanjung Bundong/Muara Tuang enggau Kampung Tradisyen Kampung Melayu sereta Lisin Berumah Sementara (TOL) Palan Diau bagi SPK Tanjung Bundong Renggat 4 enggau 5 di Balai Suarah Kota Samarahan, apin lama ke udah.

KOTA SAMARAHAN: Penumbuh Ejensi Pemansang Rajang Delta (Radda) ulih nyeririska pemansang infrstruktur di menua pesisir sereta nyeliahka penyadi projek beserak.

Sapit Menteri Pemansang Mengeri Enggau Pengeraja Asal Datuk Len Talif Salleh madahka, penumbuh ejensi nya mega deka ulih ngasuh sida meri fokus pemansang ngagai sesebengkah palan enggau lebih meruan.

“Ejensi nya ngasuh kitai nyeririska semua pemansang sereta aktiviti baka jalai raya, bekal ai enggau kuasa karan, telekomunikasyen enggau ke bukai.

“Nya nyengkaum pemansang kampumg lama nyadi Skim Nangkir Genturung Pendiau (SPK) enggau Skim Pengentap Baru (SPS) kelebih agi ba sitak aku di Belawai din,” ku iya.

Len Talif bejaku munyi nya ba aum media pengudah bejadika pengawa nyuakka Warta Rizab Komunal Bumiputera ba baruh Seksyen 6 Kanun Tanah Nengeri (KTN) bagi Kampung Bangka Semong enggau Surat Pala Tanah Seksyen 18 KTN (Betanam Betupi/Berumah) bagi Kampung Tanjung Bundong/Muara Tuang enggau Kampung Tradisyen Kampung Melayu sereta Lisin Berumah Sementara (TOL) Palan Diau bagi SPK Tanjung Bundong Renggat 4 enggau 5 di Balai Suarah Kota Samarahan, apin lama ke udah.

Iya ti mega Adun Kuala Rajang madahka, pengari rayat (Kaban Parlimen enggau Adun) bisi diberi agih belanja ngatur pemansang ba sitak sida empu.

“Nya kebuah penumbuh ejensi baka Radda tu beguna awakka ulih nyeririska pemansang infrastruktur nangika pemansang projek di sesebengkah palan ti dipegai sida betinggang.

“Aku ngarapka penumbuh Radda ulih ngerembaika ekonomi menua enggau sukut bukai,” ku iya.

Iya mega madahka garis entara Radda nya deka dikerandauka dulu.

“Nitihka penemu aku, ejensi tu mayuh ngaul sitak Mukah, engka ari Selalang Tanjung Manis nyentuk Balingian.

“Tang pekara nya deka dikerandauka aku dulu enggau Premier Sarawak Datuk Patinggi Tan Sri Abang Johari Tun Openg sereta Sapit Premier Sarawak Datuk Amar Douglas Uggah Embas enggau Datuk Amar Awang Tengah Ali Hasan.

“Randau nya beguna dikena kitai nemu garis entara ti nyemetak ejensi ti ditumbuh awakka kitai ulih bejalaika pengawa enggau manah,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak