RINDU ATI…Nanta (kanan) benung berandau enggau Karim maya ngulu Gempuru Besai Komiti Indu enggau Nembiak Parti Pesaka Bumiputera Bersatu Sarawak (PBB) Ke -15 ke dipenyadika Sapit Presiden PBB, Datuk Amar Douglas Uggah Embas di BCCK, Kuching kemari.-kGambar GHAZALI BUJANG

KUCHING: Penerang politik ngagai orang biak ba renggat sekula sekondari tauka institusyen pelajar tinggi patut diperati ngambika enda ngeruga pelajar nembiak.

Sekretari Besai Parti Pesaka Bumiputera Bersatu (PBB) Datuk Seri Alexander Nanta Linggi madahka, pekara nya dipeda agi tumu ungkup nembiak ngaul diri dalam politik ti lebih ekstrem taja pan Undi18 udah dipejalaika.

“Kitai nemu sigi endang beguna ngaul nembiak enggau politik kelebih agi sida ti beumur 18 taun ke atas laban maya umur tu, sida nyadi pengundi.

“Tang, sida mesti bejimat awakka dunya politik enda ngeruga tauka meri perati lebih ari pengawa belajar sida laban raban nembiak tu agi nyadi nembiak sekula,” ku iya.

Nanta bejaku munyi nya lebuh ditanya pemberita rambau Gempuru Besai Nembiak enggau Orang Indu PBB ke-15 di Palan Aum Borneo Kuching (BCCK) ditu, kemari.

Nanta ti mega Kaban Parlimen Kapit madah munyi nya bekaul perambu numbuhka kelab politik di renggat sekula enggau institusyen pelajar tinggi bekau penumbuh Raban Orang Biak PBB.

Taja pia, iya nandu PBB deka seruran muka peluang ngagai raban orang biak ti beminat ngaul diri dalam politik.

Ku iya, PBB bisi mayuh program dikena ngaul sereta meri penerang ngagai raban orang biak dalam bidang politik.

“Nya alai, raban orang biak ulih diasuh kitai megai tanggungpengawa dalam jalai politik ti dikeandal nyadi tuai ba jeman ti deka datai,” ku iya.

Suara Sarawak