PREMIER DATUK PATINGGI ABANG JOHARI TUN OPENG

KUCHING: Sebuah menua mesti bisi politik ti tegap laban nya nyadi kelai orang deka meranakka puku di menua kitai tauka enda, lalu meri empas besai ngagai rega ringgit menua.

Premier Sarawak Datuk Patinggi Tan Sri Abang Johari Tun Openg madahka politik tu chukup beguna ngagai Malaysia dikena numbuhka sebuah perintah ti tegap.

“Penanggul inflasyen tu endang nyadi penanggul ba serata dunya laban rega barang niki ngujungka orang lenyau pengawa.

“Nyema pekara tu nyadi, kitai endang bisi kena tempias tang ungkup nengeri kitai empu Strategi Pemansang Pasca Covid-19 (PCDS 2030) sigi udah diatur aku,” ku iya.

Abang Johari bejaku munyi nya lebuh ditanya media pengudah bejadika Masegit Darul Naim Kampung Lintang Petra Jaya ditu, kemari.

Ku iya, nengah strategi nya perintah andal ulih bejalaika projek enggau projek sakit dalam nyemelaka rega barang ti bisi diatu.

“Reti iya projek kitai deka terus dipejalaika lalu nya enda ngeruga ari sukut pengawa puang, orang deka bisi pengawa.

“Kitai (Sarawak) chukup betuah laban udah bisi strategi tu ari sukut pemamsang ti udah dilangkar aku ba PCDS 2030,” ku iya.

Abang Johari ti mega Chairman Gempung Parti Sarawak (GPS) madahka, penanggul ti nuntung menua tu udah ulih dipelabaka iya pengudah pengerekai penyakit Covid-19 majak punas.

“Proses penyuman nya mesti bisi napi penanggul enti kitai enda meri bantu mata duit (penyungkak) ngagai ekonomi menua, nya kebuah kitai nambahka agih belanja dalam bajet menua ngambika ekonomi kitai terus ngerembai.

“Semina siti penanggul ti ngeruga kitai iya nya rega barang laban kitai mayuh ngimport pemakai ngujungka rega ringgit kitai lemi, nya mai reti ungkus import kitai tinggi.

“Pekara tu meri empas ngagai penguna, pekara nya ngirauka ati aku tang kitai enggau naka ulih ngemaruhka rega barang nyengkaum nguna kuasa enggau barang ti dijaga perintah,” ku iya.

Taja pia, iya andalka ekonomi mesti ngerembai enggau nambahka kuasa eksport awakka ulih nimbang pangka meli barang ti ngemunka tukar mata duit menua.

“Nyema tukar mata duit kitai manah, rega ringgit kitai deka niki, lalu enti tu nyadi rega ringgit kitai deka tinggi ngujungka rega import kitai murah.

“Tang enti kitai nadai eksport barang, orang nadai meli rega duit kitai, nya ke ngasuh gaya ringgit kitai majak lemi,” ku iya.

Abang Johari dipinta pemberita ngelansa pekara tu bekau ari pejal sekeda orang di Semenanjung Malaysia ti minta Pengawa Bepilih Besai (PRU-15) patut dilengkaska ngena dalih ngambika sebuah perintah ti tegap ulih ditumbuhka.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak