DATUK AMAR DOUGLAS UGGAH

KUCHING: Presiden Parti Pesaka Bumiputera Bersatu (PBB) Sarawak Datuk Patinggi Tan Sri Abang Johari Tun Openg dipeda nyadi siku tuai ti sikar, berintegriti, panjai runding, berani enggau pintar ngiga penatai belanja ungkup Sarawak.

Sapit Presiden PBB Datuk Amar Douglas Uggah Embas madahka Premier Sarawak nya nyapai penyulut ti senutuk enggau Sarawak lebuh nukar gela Kepala Menteri ngagai Premier Sarawak.

“Gela nya dikena mulaika status Sarawak nyadi sebuah ari tiga buah wilayah numbuhka Malaysia.

“Nya ngeletakka Sarawak nyadi sebuah nengeri ti enda ulih disamaka enggau nengeri bukai ba Persekutuan Tanah Melayu lalu starus tu mesti ditemu nengah chara ti bebida ari nengeri bukai,” ku iya.

Uggah bejaku munyi nya rambau jaku pengelalu Gempuru Besai PBB Ke-15 di Palan Aum Borneo Kuching (BCCK) ditu, kemari.

Ku iya, semua 82 pampang PBB di serata Sarawak seati ngetanka penuduk Abang Johari nyadi Presiden PBB tauka menang pantai bagi penggal 2022-2025.

“Kami pechaya di baruh iring Abang Johari, PBB deka nyamin penegap, pengelikun enggau penyulut Sarawak.

“Ngagai semua kaban PBB, aram kitai beserakup, bekerejasama enggau bedisiplin tinggi ngambika Gempung Parti Sarawak (GPS) kelebih agi PBB menang besai ba PRU-15 tu ila,” ku iya.

Sama bisi datai Abang Johari, Sapit Presiden PBB Datuk Amar Awang Tengah Ali Hasan, Presiden Parti Sa’ati Rayat Sarawak (SUPP) Datuk Seri Prof Sim Kui Hian, Presiden Parti Rayat Sarawak (PRS) Datuk Joseph Salang Gandum, Presiden Parti Progresif Demokratik (PDP) Datuk Seri Tiong King Sing, Chairman Mendam Parti PBB Tan Sri Datuk Amar Mohamad Asfia Awang Nasar, Sekretari Besai PBB Datuk Seri Alexander Nanta Linggi, Tuai Orang Indu PBB Datuk Seri Hajah Fatimah Abdullah, Tuai Nembiak PBB Miro Simuh enggau ke bukai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak