MATU: Perintah Sarawak udah ngemendarka agih belanja penyampau RM130 juta dikena bejalaika Projek Jalai Igan ngagai Sibu.

Premier Sarawak Datuk Patinggi Tan Sri Abang Johari Tun Openg madah, jalai baru nya disadang tembu penuh ba timpuh tiga taun.

Ku iya, projek besai nya ukai semina deka meri pemaik ngagai rayat ba Igan tang mega ba selampur Sarawak.

“Empas projek jalai tu chukup besai, nya kebuah aku udah minta penyampau ungkus diguna ungkup tuju nya.

“Opis Kereja Raya (JKR) melabaka projek nya beungkus RM130 juta, kami (perintah) ngemendarka agih belanja nya,” ku iya.

Abang Johari mansutka jaku nya ba Pengawa Bejadika Pengerami Matu 2022, ensanus.

Ku iya, projek nya sebagi ari pengeransing Perintah Sarawak ngambi nyendiaka infrastruktur pemadu manah ti diguna rayat.

Ku Abang Johari, kelimpah ari projek nya, perintah mega benung chakah bejalaika projek ngaga Jematan Igan ti beungkus RM285 juta.

“Tu mega sebagi ari inisiatif kitai nentuka sitak Jemoreng enggau Igan terus mansang nipakka pemansang ke diatu.

“Kami mega dekaka rayat ngena manah peluang ari pemansang ti disediaka tu.
“Kitai udah bisi jematan Batang Igan ti beungkus urung RM285 juta lalu diatu ditambah enggau siti agi projek beungkus RM130 juta.

“Dalam beberapa taun tu aja, aku meri kita manggai RM500 juta dikena ngemansangka sitak tu,” ku iya.

Nambahka nya, Abang Johari mega ngemendarka agih belanja ungkup sekeda projek bukai baka agih belanja tambah ungkup Mesejit Kuala Matu baru.

Nya kebuah, iya dekaka semua rayat beserakup enggau nyukung penuh agenda perintah nentuka projek pemansang ti dilanggur lanchar dipejalai.

Sama datai Sapit Menteri ba Opis Premier Sarawak (Pekara Korporat, Pemadah enggau Unit Komunikasyen Perintah Sarawak) Datuk Abdullah Saidol, Sapit Menteri ba Opis Premier Sarawak (Integriti enggau Ombudsmen) Datuk Dr Juanda Jaya enggau Kaban Parlimen Igan, Ahmad Johnie Zawawi.

BEJADI… Abang Johari bejadika Pengerami Matu disempulang bala bukai.

Suara Sarawak