Premier Sarawak Datuk Patinggi Tan Sri Abang Johari Tun Openg

KUCHING: Premier Sarawak Datuk Patinggi Tan Sri Abang Johari Tun Openg ngemendarka Projek Skim Nangkir Kampung (SPK) Melayu Bau digaga.Ku iya, peminta nangkir kampung nya ulih diatur laban Parti Gempung Sarawak (GPS) gaga meda pemanah budaya rayat di menua tu.

“Semua ti dipinta Henry (Adun Tasik Biru Datuk Henry Harry Jinep) tadi, ti deka ngaga Palan Budaya Bidayuh enggau SPK Melayu Bau tau magang.

“Bekaul isu ‘pampas ngali’ kitai deka berunding baru, bisi Direktor Tanah enggai Survei ditu, kami deka meda pekara nya,” ku iya.

Abang Johari bejaku munyi nya lebuh ditanya pemberita pengudah ngulu Pengerami Ngelalu Pengabang Gawai Bau 2022 di Balai Suarah Bau, ditu kemari.

Abang Johari ngelansa pekara nya nyaut peminta Henry ti minta SPK Kampung Melayu Bau digaga dipelabaka beungkus RM40 juta.

Henry madahka nengah pemansang SPK nya, aktiviti sosioekonomi di Bau dikeandalka terus ngerembai enggau muka mayuh peluang dagang sereta pengawa puang ngagai rayat.

Iya mega bisi nyebut isu bekaul pampas ngali ba Bau ngambika diperatika baru.

Berebak enggau nya, Abang Johari mega madahka pemansang ti dibai Perintah Sarawak nya mungkur pengawa ngaga begunan Kaunsil Kandang Mengeri Padawan (MPP) ti udah dikemendarka iya.

“Semua tu ulih digaga laban kitai bekerejasama, aku gaga laban semua komponen parti GPS udah ngaga Aum Tiga Taun Sekali, lalu semua aum sida nya bejalai enggau manah.

“Kitai nadai belaya enggau berebut pangku pengawa, enti kitai berebut nya deka ngasuh pengawa kitai nambah.

“Tang lebuh GPS kering, sada GPS deka inggar didinga, nya kebuah aku minta semua kita ba sitak tu meri penyulut besai ngagai chalun GPS ti disabung ba ditu rambau Pengawa Bepilih Besai (PRU) ti deka datai,” ku iya.

Tandu iya, rayat ulih ngasaika pemedis lebuh begulai enggau penyakal ti enda tentu ngembuan perambu pemansang ngagai rayat.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak