GEMPURU BESAI…Presiden PBB Datuk Patinggi Tan Sri Abang Johari Tun Openg (tengah) enggau bini iya Puan Sri Datuk Amar Juma’ani Tun Tuanku Bujang sereta Sapit Presiden Datuk Amar Douglas Uggah Embas enggau Datuk Amar Awang Tengah Ali Hasan begambar kenang enggau semua ketuai parti nya nyerumba Pengawa Bejadika Gempuru Besai PBB di BCCK, kemari.-Gambar RAMIDI SUBARI

KUCHING: Presiden Parti Pesaka Bumiputera Bersatu (PBB) Sarawak Datuk Patinggi Tan Sri Abang Johari Tun Openg andalka Gempung Parti Sarawak ulih nyapu semua 31 penuduk Parlimen dalam Pengawa Bepilih Besai (PRU-15) ti deka datai.

Iya ti mega Adun Gedong madahka penyulut sida rambau Pengawa Bepilih Besai Nengeri (PRN-12) tu tadi patut nyadika peransang gawa bebendar agi.

“Ba PRN, kitai menang 47 penuduk Dun PBB di Sarawak anang sumbung tang gawa bebendar.

“Semua juluk ati tu ulih digaga nyema semua orang ngembuan niat ti manah,” ku iya.

Abang Johari bejaku munyi nya rambau Bejadika Gempuru Besai PBB Ke-15 di Palan Aum Borneo Kuching (BCCK) ditu, kemari.

Ku iya, nya kebuah kaban parti mesti belajar pasal politik menua sebedau tama amai dalam politik.

“Mesti pandai besilat dulu, udah nya kitai ngajar bakih kitai Parti Sa’ati Rayat Sarawak (SUPP) enggau ke bukai besilat.

“Bunga silat mesti sama, ayun pan mesti sama, baru nyadi,” ku iya.

Iya nangkan nya, meransang bala pengundi berumur 18 taun sama bela seretai enggau PBB.

“Ungkup pengundi beumur 18 taun, aku andalka sida enggau kitai laban PBB nyaga sida.

“Semua pengawa kitai diatu ungkup sida jemah ila,” ku iya.

Dalam jaku iya kemari, Abang Johari ngelansa sekeda pekara ti ditapi Perintah Gempung Parti Sarawak (GPS) kenyau iya megai menua.

Ku iya, entara pekara ti ditapi menua tu iya nya pemar pengerekai penyakit Covid-19, tang iya enggau gaga madahka semua pemar nya ulih diputarka perintah nengah Komiti Penyangga Penusah Nengeri (JPBN) lalu semua belanja mutarka pemar tu ditanggung perintah.

Kelimpah ari nya, politik menua ti enda tegap mega nyadi penanggul ngagai Sarawak ke alai iya madahka nadai kala dalam sejarah menua dalam kandang tiga taun bisi tiga iku Menteri Besai.

Abang Johari mega ngelansa, mulaika hak Sarawak ti udah punas enggau pemar ngiga belanja menua entara pemar ti ditapi perintah.

Ku iya, taja pan Pakatan Harapan (PH) bisi mai ubah konstitusyen suba tang sida enda ulih nyukung ubah nya ketegal enda mungkur ubah Pekara 160 ti nyeririska Sempekat Tanah Melayu, Sempekat Malaysia 1963 (MA63) enggau agih penuduk dalam Komiti Entara Perintah (IGC).

Iya mega nandu, madahka pekara pemansang tetap diteruska GPS taja pan mayuh pekara pemansang baka jematan besai ti ngaul rayat menua pesisir enggau mengeri dikinsil PH.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak