LIKUN AGI… Sikie ngempat riben kelai bejadika jalai nuju Rumah Jampi anak Iran, Nanga Bulu, Jalai Sangan- Merit di Tatau.

TATAU: Pengundi ba sitak Selangau enggau Dun Kakus enggau Tamin dipinta anang nandu pengilap ke dulu maya Pengawa Bepilih Besai Ke-15 (PRU15) dikena nyeliah ari terus ditipu enggau danji pelesu raban penyakal.

Menteri ba Opis Premier Sarawak, Datuk John Sikie Tayai madah, PRU ukai endur pengundi ngaga eksperimen laban pangka nya chukup besai ukai semina ngagai rayat ba sitak nya tang mega ngagai nengeri enggau menua tu.

Ku Sikie, sida mesti sedar penyakal semina pandai nabur danji dikena bulih undi tang Perintah Gempung Parti Sarawak (GPS) ti mayuh mantu nyaga pengelantang pengundi ba sitak nya.

“Anang ngasuh pekara ke nyadi ba taun 2018 betandu, chukup mih utai ke nyadi nya ngajar kitai ba sitak Selangau, Kakus enggau Tamin.

“Pemujur GPS ngempu semua 31 penuduk ba PRU ke deka datai beguna amat dikena mulaika hak Sarawak baka dipasuk dalam Sempekat Malaysia 1963 (MA63) nyengkaum nerima agih belanja pemansang ari Perintah Besai,” ku iya.

Sikie mansutka jaku nya lebuh bejadika jalai enggau Pengerami Ngiling Bidai di Rumah Jampi anak Iran, Nanga Bulu, Jalai Sangan-Merit, ensanus.

Nambahka nya ku Adun Kakus, pengilap lebuh PRU-14 anang ditandu maya PRU ke deka datai.

Ba pengerami nya, Sikie udah ngemendarka geran Projek Mit Pemansang Menua Pesisir (MRP) penyampau RM20,000 enggau RM5,000 ngagai Komiti Pemansang enggau Pengelikun Genturung Pendiau (JKKK) enggau Gerempung Indu Rumah Jampi.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak