SARIKEI: Perintah Malaysia dikearapka teulihka jalai ti lebih engkeman agi dikena mutarka penanggul inflasi di menua tu enggaika majak balat agi.

Penulung Khas ngagai Kaban Parlimen Sarikei, Roderick Wong madahka, jalai ti engkeman patut digaga dikena mutarka penanggul tu ti bepun ari rega barang diguna ninting hari ti majak mar rega.

Tu nyengkaum rega minyak makai, telu manuk, dagin manuk enggau utai bukai ti mar amat rega ti udah nating pengidup rayat mayuh.

Ku iya mega, enti nyema Chukai Barang enggau Servis (GST) dikemendarka baru dalam timpuh rega barang niki ke diatu, tu mega deka balat agi nating pengidup rayat.

Berebak enggau nya, iya ngarapka perintah bisi jalai dikena mutarka penanggul ke bakatu enggaika majak ngenusahka rayat.

Iya mansutka penemu tu lebuh ngulu Program Ngiling Tikai ti diatur ba Rumah Nyanggau ditu, kilah ensanus.

Ba program nya mega, iya madahka pengaga ati diri lebuh ke ngulu pengawa nya laban mayuh utai ke baru dipelajar bekaul enggau main asal bansa Dayak.

Berebak enggau nya mega, iya bisi nerangka bekaul bantu ti bisi disediaka ba Opis Servis Kaban Parlimen Sarikei ungkup mensia mayuh.

“Kami bisi nyediaka program bantu Biasiswa sereta bantu ‘Keluarga Tunggal’ dikena nulung rayat ti begunaka bantu ke baka tu.

“Ngagai sapa-sapa ti begunaka bantu tu, datai mih ngelawa opis kami lalu anjung mih peminta kita,” ku Roderick.

KEMERAH…Roderick bebuti enggau peranak Rumah Nyanggau.

Suara Sarawak