GAWA BENDAR AGI…Datuk Gerald Rentap (tengah) begulai enggau bala bukai ba Gempuru Besai Komiti Indu enggau Nembiak Parti Pesaka Bumiputera Bersatu Sarawak (PBB) Ke -15 ke dipenyadi Sapit Presiden PBB, Datuk Amar Douglas Uggah Embas di BCCK, Kuching kemari.-Gambar GHAZALI BUJANG

KUCHING: Raban nembiak diperansang anang takut ngena teknologi laban teknologi tu enda nemu nganu mensia tang iya ngelempungka semua pengawa mensia.

Tuai Nembiak Parti Pesaka Bumiputera Bersatu (PBB) Sarawak Datuk Gerald Rentap Jabu madahka nembiak ti ada ba jeman teknologi siti peneleba ti patut dikemegah.

“Nembiak rebak baru deka ada dalam jeman digital, ‘cyberspace’, artificial intelligence (Al), Industrial Revolution (IR) enggau mayuh agi jaku digital bukai.

“Semua tu digaga dikena meri penyenang ngagai rayat, ‘ketek aja, senang amat’,” ku iya.

Gerald bejaku munyi nya rambau Aum Besai Nembiak enggau Orang Indu PBB ke-15 di Palan Aum Borneo Kuching (BCCK) ditu, kemari.

Ku iya, raban nembiak patut mansang nengah pelasar pemansang nembiak awakka ulih besemekih sereta semangat ngiri penemu dalam negapka penau ba jeman ‘Metaverse’ diatu.

“Diatu, opis menteri aku empu numbuhka mayuh inisiatif ti udah diperambu baka Micro Credit Financing, Sarawak Youth Creative Industry Fund, Gig Economy enggau ke bukai.

“Tu nyengkaum ngayanka e-lumba enggau pekara dagang ti ditanam kenyau aku dichiri nyadi Sapit Menteri.

“Nya alai, aku merambu nembiak baru patut ngepunka ‘head start’ awakka Perintah Gempung Parti Sarawak (GPS) meri bantu ngagai anak kitai ti beumur 17 taun baka bantu ngambi lisin motosikal tauka kerita,” ku iya.

Iya madahka pekara nya dikena mantu nembiak ti baru berengkah ngepunka pengawa baka servis nganjung pemakai tauka barang baka ‘grab food’ enggau ‘food panda’.

“Siti pesan pemadu aku ngagai raban nembiak iya nya anang kelalah, kereja bebendar tang mesti pintar, enti nadai kereja ambis kitai laban sida robot enggau pekereja pengawa luar deka ngelih kitai,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak