GEMPURU BESAI PBB…Premier Sarawak Datuk Patinggi Tan Sri Abang Johari Tun Openg maya datai Bejadika Gempuru Besai PBB Ke-15 di Palan Aum Borneo Kuching (BCCK) ditu, kemari.-Gambar RAMIDI SUBARI

KUCHING: Rayat menua tu patut praktikal nguna Jaku English ti dikena jeman diatu seriris enggau fakta ti bisi dalam konstitusyen.

Premier Sarawak ti mega Presiden Parti Pesaka Bumiputera Bersatu (PBB) Sarawak Datuk Patinggi Tan Sri Abang Johari Tun Openg madahka Sarawak udah nerima Jaku Melayu nyadi jaku rasmi menua.

“Kitai mega agi ngetanka Jaku English nyadi sebengkah agi jaku ti dikena dalam komunikasyen.

“Dalam bup konstitusyen ba baruh Pekara 161 (3) bisi disebut kitai ulih nguna Jaku English,” ku iya.

Abang Johari bejaku munyi nya rambau Bejadika Gempuru Besai PBB Ke-15 di Palan Aum Borneo Kuching (BCCK) ditu, kemari.

Ku iya, laban nengeri Sarawak ti nyingkang ngagai pekara menua digital, hidrogen enggau karbon, mayuh leka jaku English bisi dikena.

“Baka ni kitai ngalih leka jaku Augmented Reality ngagai jaku Melayu? Lalu baka ni kitai ngalih jaku karbon ngagai jaku Melayu?

“Enggai nyadi, kitai mesti praktikal, ukai aku enggai nitihka Perintah Besai tauka ukai aku ngelaban polisi nasional.

“Tang kitai bepelasarka konstitusyen enggau fakta ukai semina bejaku atas angin, lebuh kitai ngusung menua luar kitai nyadi meh orang Sarawak,” ku iya.

Nya alai, iya madahka semua kaban PBB mesti nyadi orang ti ‘multilingual’.

“Menua kitai tu mit, enda ulih dibanding enggau menua China enggau Eropah, tang awakka mit kitai tu baka mit chabi, majak mit majak bisa,” ku iya.

Kalimpah ari nya, iya meransang rayat bejalaika sektor bertanam betupi moden baka nguna Internet of Things (IoT).

“Suah orang madah, orang ti ngereja pengawa betanam betupi tu siku orang ti ngena baju panjai, betanchut panjai, ngena tudung purun enggau gamal orang idup tusah.

“Enti baka nya keni orang deka minat ngereja pengawa betanam betupi?

“Kitai mayuh tanah, tang kitai agi suntuk barang pemakai,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak