KUCHING: Sarawak deka nyual hidrogen enggau ammonia ke Korea Selatan ti diasilka ari loji hidrogen enggau ammonia ba Bintulu.

Premier Sarawak Datuk Patinggi Tan Sri Abang Johari Tun Openg madah, kilang nya diatu benung dikemansang Samsung Engineering, POSCO enggau Lotte Chemical ari Korea Selatan enggau kerejasama Kaunsil Pemansang Ekonomi Sarawak (SEDC).

“Kilang nya deka ngasilka 630,000 tan metrik ammonia gadung, 600,000 tan metrik ammonia biru, 220,000 tan metrik hidrogen gadung pengudah tembu ila lalu 7,000 tan metrik deka dikena ungkup sektor domestik lalu laluh iya deka dieksport ke Korea Selatan,” ku iya.

Abang Johari mansutka jaku nya beserimbai enggau Randau Dagang Kuasa Sarawak Korea ba sebuah hotel tebilang ditu ke mega dipasuk Duta Republik Korea Lee Chi Beom.

Ba pengawa nya mega, Sarawak Energy Berhad enggau Konsortium Korea udah nyain kunterik projek Mikrogrid Semadang antara Sarawak Energy Berhad.

Kunterik projek nya disain Tuai Pegawai Eksekutif Kumpulan SEB Datuk Sharbini Suhaili, Mandal Presiden Nuri Flex Co. Ltd. Kim Han Soo enggau Tuai Pegawai Eksekutif KH Shinhwa SnC Co. Ltd. Min Jong Ki.

Pia mega, Abang Johari madah, Sarawak deka nempa pemansang ke meruan ungkup ekonomi hidrogen sereta nyadi pemungkal di Asia Pasifik ngambi nyerungkai, nempa inovasyen enggau ngasilka hidrogen gadung.

“Aku pechayaka tu mih maya kitai ngemansangka hidrogen. Pengudah bepuluh taun nganti pengulih hidrogen mansutka kuasa, hidrogen diatu sedia nyadi pemansut besai ungkup pemansang kuasa enggau ekonomi dunya.

“Nyau deka 90 peratus ari Pemansut Kasar Dalam Menua (KDNK) dunya udah mantaika polisi tauka inisiatif nyukung hidrogen,” ku iya.

Iya mega madah, makit hidrogen dunya majak nambah enggau pemansut hidrogen lebih dua kali lipat kenyau ari Januari 2-21 lalu manggai taun 2050, ekonomi enggau sistem kuasa dunya deka tampak manah agi.

Nangkan nya, Abang Johari madah, Sarawak udah ngelala siti ari wilayah ke bisi pengulih ba dunya ungkup Pengawa Nangkap, Ngena enggau Nyimpan Karbon (CCUS).

Ku iya, CCUS mungkur aplikasyen enggau ngurangka pengawa ngelepas kuasa enggau kereban dalam industri sereta nyukung peluang ekonomi baru ke bisi kaul enggau pemansut hidrogen enggau ammonia kurang karbon.

Nya kebuah ku Abang Johari, apin lama Sarawak udah ngemendarka Rang Undang-Undang Kanun Tanah (Pindaan), 2022 ngambi nyendiaka penuduk ke manah agi dikena ngemansangka CCUS nyadi teknologi mitigasi ti bisi kuasa ngalih ngagai ekonomi kurang karbon.

Nya alai, iya ngelaluka serikat Korea bekerejasama enggau Sarawak nyerungkai pengulih dalam CCUS.

“Aku pechayaka kerejasama entara Korea enggau Sarawak deka nentuka pengawa nguna CCUS enggau lengkas agi ungkup pemansang infrastruktur perengka pengangkut enggau nyimpan CO2,” ku iya.

NANGGAM KAUL…Premier Datuk Patinggi Tan Sri Abang Johari Tun Openg (tengah) betabi enggau Duta Republik Korea Ke Malaysia H.E. Lee Chi Beom (kiba) pengudah Randau Kuasa Daganga Sarawak Korea ditu, kemari. -Gambar Ramidi Subari

Suara Sarawak