-Friday (dua ari kiba) nembuka pengawa Ngiling Bidai ba Rumah Insol di Malong Atas.

SARATOK: Kaban Kunsil Nengeri (Adun) Krian, Friday Belik ngelalau rayat mayuh ba sitak ke dipegai iya ninggalka cherita lama pasal Pengawa Bepilih Besai Nengeri (PRN) Sarawak ke suba.

Tang ku iya, arapka semua rayat ba sitak Krian begulai enggau iya ngemujurka pemansang ti diperambu Gempung Parti Sarawak (GPS) ungkup pengelantang semua.

Kelimpah ari nya mega, Friday ngenataika jaku beterima kasih ngagai semua pengundi ba sitak bepilih di Sekula Primari (SK) Malong ti udah milih iya nyadi pengari rayat ba PRN tu suba.

Dikena malas pengarap rayat, Adun Krian nya mega besemaya deka terus ransing agi mantaika serebana rayat ngagai ejensi ti bekuasa sereta mega naka ulih mutarka penanggul sida iya.

Iya mansutka jaku tu ba Pengerami Ngiling Bidai ti diatur ba Rumah Insol, Malong Atas Krian ensanus.

Berebak enggau nya mega, iya udah ngagihka sepenyampau RM8000 ngagai Komiti Pemansang enggau Pengelikun Genturung Pendiau (JKKK) sereta RM6000 ungkup Biro Indu Rumah Insol.

Sama bela nyempulang penatai Friday iya nya Pemancha Thomas Lamit, bala kaunselor ari Kaunsil Pelilih Menua Saratok (MDS) sereta mega bala Tuai Rumah ke besemak genturung pendiau.

Suara Sarawak