DATUK FRANCIS HARDEN

SIMANGGANG: Mensia mayuh diperansang bekerejasama enggau perintah nagang penusah dadah ke nuntung menua tu ari majak ngelekai.

Sapit Menteri Pelajar, Inovasyen enggau Pemansang Penau (MEITD), Datuk Francis Harden Hollis mansutka penemu tu lebuh bejadika Program Pelajar enggau Pengawa Nagang Dadah beserimbai enggau Hari Benchi-Dadah Nasional ke-39 Renggat Pelilih Sri Aman 2022 ke diatur ba Waterfront Simanggang apin lama ke udah.

Lebuh bejaku nya, Harden madahka tanggungpengawa nagang penanggul bekaul enggau dadah tu ukai tanggungpengawa perintah menua tu aja tang tanggungpengawa semua orang.

Enggau nya, Harden meransang mensia mayuh nemuka nya ejensi perintah, Gerempung Ukai Dikuasa perintah (NGO), institusyen pelajar sekula enggau ruang bilik, tuai komuniti sereta mensia mayuh patut bekerejasama enggau perintah mutar lalu nagang penusah tu.

“Pia mega, atur ke dipejalaika perintah, ejensi perintah, NGO, tuai komuniti enggau mensia mayuh bekaul enggau penusah tu patut dipajakka setipak enggau atur sereta tanggungpengawa dalam Polisi-Polisi Menua enggau akta dadah.

“Institusyen ruang bilik patut chakah agi nunjukka chunto ti manah kelimpah nempa sereta nerenak pemanah ulah ngagai anak sida ngambika ulih nyadi terabai nagang sida ari tepejuh enggau pengawa main dadah.

“Kebuah pia laban apai indai mih orang ke pemadu semak sereta nyadi bakih ngagai bala anak sida endur sida mantai lalu mendingka sebana sida sereta nemu mayuh pekara senentang pemansang enggau utai ti enda betul ba anak sida.

“Nya alai, nyema semua orang bejalaika tanggungpengawa sida nagang penusah tu ari ngelekai, kitai ulih nempa Simanggang Sebilik ti gerai sereta jauh ari dadah setipak enggau juluk ati Malaysia Sebilik,” ku Harden.

Ku iya, pansik ke dipejalaika PDRM enggau AADK madahka dadah sintetik bansa syabu pemadu mayuh dikena ba Sarawak nyengkaum ba pelilih Simanggang lalu ripot ba taun 2021 mandangka 100 peratus sida ke ditangkap makai dadah endang makai dadah bansa syabu.

“Dadah bansa tu meri empas ke besai ngagai pengerai untak orang ke makai dadah nya lalu ngujungka sida ngembuan penyakit mental, penyarut runding sereta ngembuan penyai ulah ti enda ulih ditagang,” ku iya.

Beserimbai enggau pengawa ngenang Hari Benchi-Dadah taun tu, perintah menua tu agi mengkang nguna rambai jaku ‘Nagang Manah Agi Ari Ngubat’.

Sama ngulu program tu Residen Pelilih Sri Aman ke mega Chairman Kaunsil Pengawa Nagang Dadah (MTMD), Datuk Indit Bangai Sekretari Eksekutif Kaunsil Pemansang Sosial Sarawak, Dr. Zufar Yadi Brendan Abdullah enggau Pegawai Pelilih Sri Aman, Mohd Ashree Wee.

Program tu mega digulu Tuai Polis Pelilih IPD Sri Aman, DSP Boniface Bajai, tuai opis perintah, raban NGO, bala temenggong, pemancha, penghulu enggau tuai komuniti.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak