Datuk Seri Dr Sim Kui Hian

KUCHING: Sarawak ngerikodka urung 1,900 kes ari 386 kluster kena rampit penyakit kaki, jari enggau mulut (HFMD) dalam kandang enam minggu ke udah.

Sapit Premier Sarawak Datuk Seri Dr Sim Kui Hian nengah sebengkah penerang ke dibantai ba laman Facebook iya kilah ensana madahka, 386 kluster tu nyengkaum kes ba rumah, sekula, pra sekula, taska enggau tadika.

“Kenyau enam minggu ke udah, bisi 1,900 kes penyakit HFMD dirikodka ba Sarawak.  Dua minggu ke udah, bisi 900 kes ditangkan 1,000 kes dirikod minggu ke udah,” ku iya.

Nya alai, Dr Sim ke mega Menteri Pengerai Mensia Mayuh, Pengawa Berumah enggau Kaunsil Kandang Menua ngelalau mensia mayuh ngemeratka pemeresi sekalika ba rumah, sekula, pra sekula enggau tadika ke bisi endur anak mit.

“Nyema kita meda anak bisi gelata tauka tabin, tau (lalau sida) nurun ke klinik besemak lalu bantu raban kami ari opis pengerai mutuska pengerekai penyakit tu,” ku iya.

Penyakit HFMD ke nyadi ba anak mit beumur biak ari 10 taun ketegal igi penyakit ari raban enterovirus lalu tu ba kategori rumpun picornavirus.

Tebal agi bekau HFMD enda raya (mild) lalu kelai penyakit tu tabin ditangkan bisi gelata (blister) ba jari, kaki, mulut enggau dilah. Nembiak mega deka sendat seput, mutah, bira chirit enggau enggai makai.

Virus ti ngujungka HFMD ulih diau ba rekung enggau tai lalu ngerampit nengah chara betegu sereta ai liur kelimpah ari tai sida ke sakit.

Penyakit tu jampat ngerampit anak mit enggau ngerampit semua tikas umur tang mayuh agi mudah ngerampit anak mit ke beumur biak ari 6 taun.

Timpuh inkubasi (penyakit ngereman) iya nya entara 3 ngagai 5 hari lalu dalam timpuh tu iya chukup mudah ngerampit orang bukai maya sebedau enggau pengudah penyakit tu ayan.Anak mit ke dirampit penyakit HFMD ulih nyadi pugu penyadi penyakit tu sampai gelata iya suman. Majoriti kes diperati enda raya lalu gerai dalam kandang 5 ngagai 7 hari.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak