353 peranak tiga genturung pendiau nerima surat pala tanah Seksyen 18
MANAH…Datuk Len Talif Salleh (kiba) begulai enggau Datuk Idris Buang sereta Datuk Rubiah Wang (kanan) beratika surat pala tanah ke baru diterima siku penerima nyerumba Pengawa Nyuaka Surat Pala Tanah Seksyen 18 KTN (Pertanian) sereta Surat Pala Tanah Seksyen 18 KTN (Kediaman) Kampung Tradisi Kampung Endap di Balai Suarah Kota Samarahan, kemari. -Gambar : Mohd Alif Noni

KOTA SAMARAHAN: Sepenyampau 353 peranak ari tiga genturung pendiau mungkur Kampung Endap, Kampung Pinang enggau Tanah Puteh nerima surat pala tanah Seksyen 18 Kanun Tanah Negeri (KTN).

Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh madah, penyampau nya mungkur 54,551 lot ngatika diri udah disukat ba tanah pemesai 67,783 hektar (167,495 ikar) dipejalai ba selampur Sarawak naka 31 Mei tu tadi.

“Pengawa ngeluarka surat pala Tanah Seksyen 18 KTN tu mayuh meri pemaik ngagai pengempu tanah baka sida ngempu tanah nya belama iya seagi bisi bulan enggau bintang.

“Reti iya, pengempu tanah bisi hak ngempu tanah nya, nadai diasuh mayar chukai tanah ninting taun, nadai belanja nyukat tanah enggau nyendiaka surat pala tanah sereta enda maya premium tanah,” ku iya.

Len Talif mansutka jaku nya ba Pengawa Nyuaka Surat Pala Tanah Seksyen 18 KTN (Pertanian) sereta Surat Pala Tanah Seksyen 18 KTN (Kediaman) Kampung Tradisi Kampung Endap di Balai Suarah Kota Samarahan, kemari.

Ku iya, Perintah Sarawak seruran nyaga hak rayat ba tanah NCR sida enti sema ditagih nitihka undang-undang.

Berebak enggau nya ku iya, inisiatif baru ngaku enggau meri surat pala tanah Hak Adat Bansa Asal (NCR) ngayanka Premier Sarawak, Datuk Patinggi Tan Sri Abang Johari Tun Openg siruka rayat.

Nya kebuah ku Len Talif, Perintah Sarawak seruran nyaga hak rayat ba tanah NCR sida enti sema ditagih nitihka undang-undang.

Nambahka nya, iya madahka program nyukat genturung pendiau asal mega chakah dipejalai dikena nyamin hak peranak ngempu tanah ba genturung pendiau lama sekalika ba sitak ke udah digazet nyadi Rizab Komunal Bumiputera Seksyen 6 KTN (Kampung) tauka enda.

“Naka diatu, bisi 56,849 lot rumah ari 386 buah genturung pendiau di selampur Sarawak udah disukat. Ari penyampau nya, bisi 53,526 lot udah diberi surat pala tanah,” ku iya.

Iya mega madah, 147 peranak Kampung Endap kemari udah nerima surat pala tanah sida.

Len Talif madah nyemetak, Program Nyukat Tanah NCR Insiiatif Baru ti dipejalai ba taun 2010 meri empas positif lebih agi chara nyukat nya jampat agi.

Iya madah pekara tu nyata dipeda ari taun 2010 nyentuk 31 Mei tu tadi, Opis Tanah enggau Survei Sarawak (JTS) mujur nyukat kelingi tanah urung 1,034,037 hektar (2.55 juta ikar) ba selampur Sarawak.

Ari penyampau nya, bisi 794,503 hektar tauka 1.96 juta ikar udah digazet.

Nya alai, iya minta sida ke nerima lot ngatika diri meri kerejasama penuh ngagai JTS nentuka pengawa nyukat lanchar dipejalai.

Ku iya, kerejasama ari Tuai Raban Bansa, Tuai Komuniti enggau pengempu tanah NCR beguna amat ba program nyukat tanah NCR nya nentuka program nyukat tanah enggau nyuaka surat pala tanah enda laun diempu.

Sama datai Kaban Parlimen Kota Samarahan Datuk Rubiah Wang, Adun Muara Tuang, Datuk Idris Buang enggau Penguasa Tanah enggau Survei Bagi Menua Samarahan, Monalisa Ismail.

-abis-

MANAH…Datuk Len Talif Salleh (kiba) begulai enggau Datuk Idris Buang sereta Datuk Rubiah Wang (kanan) beratika surat pala tanah ke baru diterima siku penerima nyerumba Pengawa Nyuaka Surat Pala Tanah Seksyen 18 KTN (Pertanian) sereta Surat Pala Tanah Seksyen 18 KTN (Kediaman) Kampung Tradisi Kampung Endap di Balai Suarah Kota Samarahan, kemari. -Gambar : Mohd Alif Noni


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak