GUNA MANAH…Abdul Yakub Arbi nyuaka agih MRP ngagaio siku penerima ba sebengkah pengawa ke diatur ba Begunan Setia Raja, apin lama ke udah.

MUKAH: Sepenyampau RM250,000 Geran Projek Mit Menua Pesisir (MRP) udah mujur disuaka Adun Balingian Abdul Yakub Arbi ngagai 58 raban penerima ba sebengkah pengawa ke diatur ba Tingkat Satu Begunan Pehin Setia Raja, apin lama ke udah.

Kenu ku Abdul Yakub Arbi, MRP nya semina diberi ungkup raban ke udah diaku Opis Pelilih Mukah.

Ku iya tu dikena nyeliahka ulah salah guna kuasa enggau mega tau kena pansik nengah Akta Pencegahan Wang Haram dan Pencegahan Pembiayaan Keganasan 2001 (AMLA).

“Kitai magi MRP enggau manah lalu berebak enggau nya enggai meda pekara nerima peragam ke salah jemah.

“Pekara nya mai reti MRP semina deka diberi ngagai opis, gerempung enggau raban ke bisi akaun rasmi,” ku iya maya pengawa nyerahka agih MRP nya.

Ku iya, MRP nadai agi dipasuk nuju akaun orang siku-siku.

“Enti belanja tauka agih MRP enda chukup, raban bekaul ulih ngaga ripot belanja pasal program ti deka diatur sida.

“Udah nya, sida dilalau minta agih belanja tambah nengah keretas kereja ke udah diisi penuh lalu disempulang enggau perambu tusun program,” ku iya.

Berebak enggau nya, Abdul Yakub nangkan mensia mayuh terus bejimat enggau pengerekai Covid-19 taja Sarawak diatu udah ngalih ngagai renggat endemik.

“Patut seruran nyaga pengerai, pemeresi diri enggau terus nitihka Atur Pengawa Standard (SOP) ke udah dipadah lebih agi ari Opis Menteri Pengerai Malaysia (KKM),” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak