KE PENGINGAT…Fatimah (sebelas kiba) begambar bebala mayuh enggau bala pesereta Simposium ‘The Power of P.L.A.Y in Early Childhood Education’ ba sebuah hotel ditu kemari.

KUCHING: Malin Atur Ngelimat Belanja Perintah naka diatu nadai ngeruga agih bantu pengelantang pendiau ti diberi nengah Opis Menteri Pemansang Orang Indu, Anak Mit Enggau Pengelantang Raban Bansa.

Menteri Pemansang Orang Indu, Anak Mit Enggau Pengelantang Raban Bansa Datuk Seri Hajah Fatimah Abdullah madahka nyema agih bantu ti diberi dibaruh Perintah Besai bisi nerima pangka, sida deka ngiga jalai pemutar ngulihka bantu tambah ari Perintah Sarawak empu.

“Naka diatu nadai berubah, iya ti dipeda aku nama aja penanggul ti ditapi kitai, pekara ti pemadu diperundingka perintah iya nya pengelantang pendiau rayat.

“Nya alai, raban ti nerima empas baka raban begunaka bantu, orang seranta enggau ke bukai nadai dikelaung dalam agih bantu ninting bulan ari Opis Pengintu Pengelantang Mensia Mayuh (JKM),” ku iya.

Fatimah bejaku munyi nya lebuh ditanya pemberita pengudah bejadika Simposium ‘The Power of P.L.A.Y in Early Childhood Education’ ba sebuah hotel ditu kemari.

Ku iya, taja pan menua napi mayuh penanggul tang ari sukut agih belanja ti diberi Perintah Besai ngagai Bantu Pengintu Pengelantang nadai kena keruga naka tu.

“Nyema bisi dikeruga ambika chunto ari sukut polisi, ba renggat nengeri kitai deka meda baka ni chara nambahka bantu nya.

“Aku pechaya nyema kitai nyau datai ba tikas nya, kitai deka minta perintah nengeri meri bantu lalu aku nemu nya enda deka nyadi penanggul,” ku iya.

Ku iya, bantu ninting bulan endang datai ari agih belanja ba renggat Perintah Besai ke alai bantu tu bisi dibagi ngagai Skim Bantu Pengelantang baka Skim Bantu Indai tauka Apai Tunggal, Skim Bantu Nembiak Mit, Skim Bantu Orang Tuai, Skim Bantu Orang Nyelai Pendiau (OKU) ti gawa enggau nadai gawa sereta Skim Bantu Pesakit Raya.

Iya madahka, nyema orang nya nadai tama dalam skim bantu tu ba baruh Perintah Besai ketegal nadai nangkup syarat tang iya endang amai begunaka bantu, orang nya deka diberi bantu ba baruh Skim Bantu Am ari Perintah Nengeri.

“Bantu Am ari Perintah Nengeri baka bantu rumah angus, penusah ngenyit, kemarau, ribut kudi, bah enggau ke bukai.

“Bantu jampat deka diberi ngagai orang nya baka pemakai, pekayan, duit belanja, skim rumah panjai enggau bantu bukai,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak