BUJANG BERANI BOMBA… Tr Stevens Gadis Nyua, 58 ari Kampung Sungai Seputan Selaut Julau.

KUCHING: Genap rumah panjai di menua tu patut disikap enggau mayuh agi kereban madamka api awakka muntang dijapai lebuh nagang penusah angus nyadi.

Siku Bujang Berani Bomba, Tr Stevens Gadis Nyua, 58 ari Kampung Sungai Seputan Selaut Julau ti udah mujur madamka api rumah panjai sida kena 1 June apin lama madahka, genap peranak di rumah panjai mesti belajar chara nguna kereban madamka api.

“Tambah mayuh agi kereban madamka api di rumah panjai laban enti lebuh penusah angus nyadi kitai muntang bulih kereban nya, karam ba tasik agi bisi barang kitai melepung tang karam di darat reta kitai lengis.

“Aku meri puji ngagai Tuhan, laban rumah panjai aku mujur selamat ari angus ti bepun ari sebatang dian,” ku iya lebuh ditanya Suara Sarawak pengudah nerima Setipikit Bujang Berani Bomba ba Indu Opis JBPM ditu, kemari.

Ku Stevens, penemu madamka api dipelajar iya ari Balai Bomba enggau Penyah Penusah Bintangor.

“Nyema raban bomba bisi ngatur program tauka ngajar chara madamka api, tuai rumah, bala Komiti Pemansang enggau Pengelikun Genturung Pendiau (JKKK) sereta peranak rumah panjai anang enda enggau.

“Enti nembiak ti bisi diajar bomba ba sekula anang amu penemu ngajar peranak rumah panjai pasal baka ni nguna kereban madamka api,” ku iya.

Pengajar ba Sekula Primari (SK) Nanga Lubok Assam Julau nya madahka orang ti landik nguna kereban madamka api mesti bekunsi penemu.

Berebak enggau nya, Stevens madahka iya berasai temegah nerima setipikit bujang berani ari bomba seraya meri terima kasih ngagai Balai Bomba enggau Penyah Penusah Bintangor laban udah ngajar iya nguna kereban madamka api.

Nyerita peneleba lebuh rumah panjai sida dituntung penusah angus kena 1 June apin lama, Stevens madahka iya enda nyangka pengerami Hari Gawai betukar pekara ti nesalka ati.

“Kena 1 June baka biasa kami besembiang ari rumah ke rumah, datai ba rumah ti kepenudi iya nya rumah aku empu, kami sama bela duduk nganti dinahka orang makai.

“Enda memukai bisi orang manjung ‘api, api, angus rumah kitai’.

“Maya nya aku nadai runding bukai semina ngerunding uchu aku likun,” ku iya.

Stevens udah nya lalu belawa ngambi kereban madamka api di tengah ruai lalu tama ke bilik lumur tujuh madamka api nya.

“Rumah panjai aku bisi 11 pintu tang api nyadi ari tungkun dian ti enda dipadamka ba pintu lumur tujuh.

“Ruang besai bilik lumur tujuh ambis diempa api, tang mujur bilik bukai nadai angus laban api sigi baru nyerarai,” ku iya.

Iya nangkan nya, ngelalau orang ti bisi nguna dian ngambika bejimat lalu ngambi penyadi kes tu ke teladan sida serumah.

“Api agi mit nyadi bakih, udah besai nyadi munsuh, anang enda bejimat,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak