AUM PEMBERITA…Fatimah (tengah) benung nyaut tanya raban pemberita ba aum pemberita pengudah betuaika Aum Keterubah Kaunsil Supreme Indu (MTW) PBB Renggat 2022-2025 di Indu Opis PBB, kemari.-Gambar RAMIDI SUBARI

KUCHING: Premier Sarawak Datuk Patinggi Tan Sri Abang Johari Tun Openg deka nentuka chalun indu Parti Pesaka Bumiputera Bersatu (PBB) ti deka bediri maya Pengawa Bepilih Besai Ke-15 (PRU-15).

Tuai Raban Indu PBB, Datuk Sri Fatimah Abdullah madah, sida ngelempaika pemutus milih chalun nya ngagai Abang Johari ke mega Presiden PBB.

“Tanya sapa chalun maya PRU ila mesti dituju ngagai Premier. Aum kitai sehari tu dikena netapka tim indu mesti gawa nyadi siti tim ngambi chalun kitai menang.

“Sapa chalun, nya deka ditetapka Premier. Pekara pemadu beguna, kitai netapka pekara ke ulih nentuka juluk menang besai maya PRU-15 ulih dijapai,” ku iya.

Fatimah mansutka jaku nya ba aum pemberita pengudah betuaika Aum Keterubah Kaunsil Supreme Indu (MTW) PBB Renggat 2022-2025 di Indu Opis PBB, kemari.

Naka diatu, PBB bisi empat Kaban Parlimen indu iya nya Datuk Seri Nancy Shukri (Parlimen Batang Sadong), Datuk Seri Rohani Abdul Karim (Parlimen Batang Lupar), Datuk Rubiah Wang (Kota Samarahan) enggau Datuk Hanifah Hajar Taib (Parlimen Mukah).

Nambahka nya, Fatimah madah tim indu deka bekerejasama enggau semua tim PBB nyadi siti tim ti kuat baka dipejalai lebuh Pengawa Bepilih Nengeri (PRN) ke dulu.

“Pengawa nya beguna amat lebih agi kitai deka napi PRU enda lama agi nentuka PBB ulih menang semua penuduk Parlimen ila,” ku iya.

Nangkan nya ku Fatimah, Biro Politik Indu PBB naka ulih nambahka kaban parti lebih agi raban indu laban takah kaban agi jauh dibanding lelaki.

“Penyampau kaban PBB ba selampur Sarawak nya 356,972 ku, ari penyampau nya bisi 171,560 indu.

“Nya kebuah, kitai mesti chakah gawa nentuka penyampau kaban nya nambah lalu aku andalka tagit nya ulih dikemujur laban tim kitai sikar sereta chakah bejalaika pengawa,” ku iya madah baru.
Taja pia ku iya, tagit nambahka kaban nya apin ulih ditetapka laban deka dikerandau lenak agi ba aum biro politik ila.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak