NYENDIA PEMAKAI…Sapit Menteri Dagang Temuai, Industri Kreatif enggau Seni Pemerindang Datuk Snowdan Lawan (dua kanan) enggau Datuk Bandar Kuching Selatan Datuk Wee Hong Seng (kanan) benung beratika siku penyereta inkubator nyendiaka sekelim ngena nitrogen pelai. Bela dipeda Direktor Pengatur Pengawa WAT Sarawak Evelyn Teo (kiri) enggau Bakin Kunsi Retrospective Discovery LLP Arif Abdul Rahman. -Gambar RAMIDI SUBARI

KUCHING: Industri pemakai enggau ai (F&B) nyadi industri pemadu beguna ngagai menua laban industri nya nyendia mayuh pengawa puang enggau pengerembai sektor ekonomi.

Sapit Menteri Dagang Temuai, Industri Kreatif Enggau Seni Pemerindang ll Datuk Snowdan Lawan madahka kelimpah ari nya industri F&B mega nyadi sebengkah ari produk besai ti digiga temuai ari menua luar lebuh nemuai kitu.

“Temuai deka ngeluarka belanja ti besai ngagai F&B kelimpah perengkaguna bukai, nya alai industri tu amat beguna ditanka dalam gastronomi ekosistem.

“Nya kebuah, Kuching diaku nyadi Mengeri Gastronomi Kreatif ari Unesco ngelaika palan tu nyadi palan dagang temuai pemakai,” ku iya.

Snowdan bejaku munyi nya rambau Nanguhka Program Sarawak Gastronomy Incubator (Sago) di palan bebeli barang The Hills ditu, kemari.

Ku iya, penyelai pemakai ti mar ditemu, bemacham rempah enggau chara nyumai ti bebida sereta nyelai ngasuh Sarawak nyadi palan ti ditapatka temuai ngiga pemakai.

“Program Sago Incubator ulih mantu raban orang dagang ngemansangka produk sida awakka ekosistem pemakai tu terus meruan diintu.

“Aku gaga laban Program Sago Incubator nyadi inkubator keterubah diatur ba Malaysia, ke alai program baka tu ulih ngenegapka industri servis pemakai dagang temuai,” ku iya.

Iya nangkan nya madahka, pemakai di menua tu mega nyadi sebagi ari kelai penyerakup ti ditanggam rat rayat Sarawak.

“Mayuh kitai nemu, ketegal pemakai kitai beserakup, lalu ketegal pemakai mega kitai ulih begempung dalam pupu raban bansa di menua tu,” ku iya.

Snowdan nangkan nya ngelalau pengemeran dagang dalam Sago Incubator ngambika terus nyaga pemeresi produk dagang sida.

Kelimpah ari nya, iya mega ngelalau raban orang dagang ti ba baruh program nya ngambi pengereja pengawa menua tu empu endur mandangka penyelai bansa pemakai asal ti dijual sida.

Sama bisi datai Datuk Bandar Kuching Selatan Datuk Wee Hong Seng, Direktor WAT Sarawak Evelyn Teo, COO The Hills Lionel Ho, Menijar Kunsi Restrospective Discovery LLP Arif Abdul Rahman enggau bala bukai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak