UJAK BAKA TU…Henry enggau Aziz ngujak Jalur Gemilang ba mua Tasik Biru nyadi kelai program Semarak Gemilang 2022.

BAU: Semangat beserakup dalam Serakup Besai Malaysia, enggau tu konsep Malaysia Sebilik mujur nyerakupka rayat enda ngira bansa, pengarap enggau daya idup taja ngembuan penemu politik ke bebida.

Pia, ku Adun Tasik Biru Datuk Henry Harry Jinep ti madah penatai ke bebida nyadi pugu penyerakup dikena ngangkatka penyiru ke menua ti nyadi ideologi enggau pekara ke patut disukung.

“Nya alai, aku nesau semua renggat komuniti lebig agi ba pelilih Bau terus mandangka semangat patriotisme nengah chara nuatka lambang kuasa menua iya nya Jalur Gemilang.

“Kitauka enggau penuh penyiru enggau temegah ati laban nya lambang menua kitai, Malaysia Sebilik,” ku iya maya bejadika ‘Semarak Gemilang 2022’ di Tasik Biru, ditu, ensana.

Program tu endang sebengkah aktiviti dalam kimpin Ngitau Jalur Gemilang ke diatur nyerumba Hari Kebangsaan enggau Hari Malaysia 2022.

Program diatur Opis Pemadah Sarawak (Japen) nya kebendar dikena niu semangat sayauka menua nengah pengawa ngitau Jalur Gemilang.

Pengawa ngemujurka program tu mega nyadi pelasar ngagai Japen bekerejasama enggau bakih kunsi sida ke seruran nyukung pengawa, sekalika ba renggat pelilih menua tauka renggat nengeri.

Direktor iya, Jaafar Jantan madah nengah pengawa ngatur program ke baka nya, semua bakih strategik Japen lebih agi komuniti Malaysia Sebilik enggau tuai raban bansa patut meretika pesan ke deka dikenataika perintah nuju rayat.

“Komuniti Malaysia Sebilik bepelasarka komiti volunteer nyadi bakih kunsi Japen dalam ngenataika penerang enggau nentuka pengelantang penyerakup ba raban rayat tejamin enggau dijaga meruan.

“Nya alai, nengah program tu, genap ejensi perintah, opis bekanun enggau semua opis eperibit ulih begulai meri sukung nengah chara ngitau Jalur gemilang ba genap premis diri,” ku Jaafar nengah teks iya ke dibacha sapit Aziz Abdul Rahman.

Kelimpah program Semarak Gemilang 2022, opis nya mega bisi ngatur program Infiesta Pentarama.

Sama datai Pegawai Pelilih Bau Anielia Siam enggau Direktor Kolej Komuniti Mas Gading Shirley Philip.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak