JAGA PENGERAI…Dr. Mirunaaleni Selvaraju (dua ari kiba) benung mantaika penerangka ngagai SAO Jenet (dua ari kanan).

PAKAN: Lima resia dikena kitai ngintu sereta nyaga pengerai diri ambika semampai regas belama lalu patut ditemu sereta dititih, ku Dr.Mirunaaleni Selvaraju ari Unimas.

Ku iya, resia ke lumur satu iya nya kitai mesti nyaga pemakai lalu makai nitihka sepematut iya ti bisi mega dibantaika ba Pinggi Pengerai Opis Menteri Pengerai Malaysia (KKM).

“Kitai patut lebihka agi makai buah enggau sayur sereta kurangka mimit asi lalu pekara tu bisi kala dipeda lalu ulih dibacha ba Pinggai Pengerai ti dikeluarka KKM.

“Arapka kitai ulih nagang diri ari makai asi ti kelalu mayuh lalu kurangka ngambi protein ti lebih sereta kurangka pemakai ti mayuh ngundan gula,” ku Mirunaaleni.

Ba pekara ke lumur dua, iya madahka pengawa latih (besenam) enggau kereja ti ngemansutka peluh endang sebengkah ari chara ulih meri pengerai ngagai tubuh enggau runding.

Ku iya, baka sida ke diau ba rumah panjai, sida iya ulih bejalai sebelah ruai sereta mega ngereja aktiviti betanam betupi ti mega nyadi siti chara dikena mansutka peluh.

Iya mega nangkan mensia mayuh ba pekara lumur tiga iya nya anang nginsap laban pengawa ke bakatu endang udah ditemu balat ngeruga pengerai.

“Enti ulih, anang sekali kali kitai nginsap laban tu enda manah ungkup pengerai kitai lalu pekara tu suah dipadahka Opis Pengerai dikena nangkan mensia mayuh.

“Pia mega pekara ke lumur lima ti besangkut enggau nginsap iya nya anang kelalu ngirup ai bisa ti ulih ngelemika penakal tubuh kitai.

“Enti semina diambi enggau mimit aja lalu enda suah dikereja, tu ulih tang enti lebih iya tau ngeruga pengerai,” ku iya nerangka resia nyaga pengerai.

Lalu pekara ke lumur lima iya nya mesti nyaga pengerai ba runding laban tu entara pekara ke chukup beguna dalam pengidup kitai besehari hari.

Iya mega madah enggau nyemetak, enti runding kitai enda gerai ti semampai kachau, nya ngujungka kitai tau tusut runding.

Dikena nyeliahka pekara tu, iya ngarapka tiap iku kitai semampai ngisukka diri enggau aktiviti ti engkeman baka masuk pekit ba lumba sereta main enggau pekara ke bukai ti engkeman.

“Aku pechayaka, enti semua lima resia tu dititih belama, kitai ulih idup bepengerai lalu semampai regas batang tubuh.

“Titihka mih resia tu sepemanjai idup kitai ambika kitai regas, lantang senang sereta semampai gerai belama.

“Arapka ari penumbuh karnival tu, ulih meri semua kitai penyedar bekaul pengerai ti chukup beguna dalam pengidup kitai mensia di dunya tu.

Iya mansutka jaku tu ba ‘Karnival Pengerai Jom Sihat’ ti diatur ba Rumah George Chunggut Nansang, ditu ensanus.

Sama bisi datai ba karnival tu iya nya Pegawai Pengatur Pengawa Opis Pelilih Menua Pakan Jenet Boondar, Tuai Pemeresa enggau Kualiti Liew Sooi Peng, Presiden Gerempung Nagang Penyakit Tibi Sarawak Datin Louise Luncha Kanyan, Koordinator Program Makie Thung enggau Mastura Saad sereta mensia mayuh ke besemak genturung pendiau.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak