DR AMMAR REDZA AHMAD RIZAL

KUCHING: Pemutus Parti Tindakan Demokratik (DAP) ngirai chalun biak maya Pengawa Bepilih Besai Ke-15 (PRU-15) endang atur ti strategik.

Pemikir politik, Dr Ammar Redza Ahmad Rizal madah, ngirai chalun biak ba pengawa bepilih ulih matak minat pengundi biak ke bukai.

Taja pia, iya betalatka pengawa nya enggau tanya dini DAP deka ngirai chalun biak nya maya PRN-15 ila.

“Sekalika chalun biak disabung ba penuduk ti selamat ungkup DAP tauka ba penuduk ke disangka sida enda ulih menang?

“Enti sema nyabung ba penuduk chalun ke enda ulih menang enggau nejuka chalun senior mengkang ba penuduk selamat, nadai bida chalun biak enggau ‘agum pengias’,” ku iya nerang.

Pengelicha Pusat Kajian Media dan Komunikasi, Universiti Kebangsaan Malaysia (UKM) nya madah, enti sema DAP deka mantaika orang bukai, sida mesti netapka chalun biak ba sekeda penuduk selamat dalam DAP.

Ku Dr Ammar Redza, DAP mega mesti ngemendarka chalun senior bediri ba penuduk ti ‘angat’.

“GPS ngasaika ba Pengawa Bepilih Nengeri (PRN) ke dulu, sida udah ngirai chalun baru enggau biak bediri minta pilih.

“Nya kebuah aku ngasaika pekara tu mesti terus dipejalai lalu sida mesti ‘nyabung’ chalun biak ari GPS ba penuduk selamat.

“Pengawa tu mega mesti mungkur semua parti komponen dalam GPS laban sida enggai semina siti parti ti bebendar nganjung chalun biak lalu parti bukai agi nganjung chalun lama,” ku iya.

Kena Hari Empat tu tadi, media ngeripot Kaban Parlimen Bandar Kuching, Dr Kelvin Yii madahka DAP deka lebih ngemeratka chalun biak maya PRU-15 ke deka datai.

Ku Tuai Nembiak DAP (DAPSY) Renggat 2021-2023 nya, pengawa nya deka dipejalai sekalika ba renggat parlimen tauka nengeri.

Suara Sarawak