MUJUR…Tim Marshall ti semampai meri sukung sepemanjai ngatur program.

PAKAN : Beserimbai enggau Hari Sarawak 2022 mayuh program ti udah diatur dikena ngerichahka hari ti pemadu besai reti nya.

Pia mega, di pelilih Pakan nengah kelab motosikal ba menua nya udah ngintu Hari Sarawak dikena ngingat menua tu udah merdeka.

Program Pakan Sarawak Day Ride diatur Pengajar Chrisroyston enggau bini iya Olivia Avilla nengah kelab motosikal ti diberi nama On the Way (OTW) Bike Club.

Ku Chrisroyston, program tu diatur dikena ngerami Hari Sarawak ti begulai enggau komuniti ti rinduka pengawa motosikal ba menua Pakan sereta di menua Sarikei enggsu Sibu.

“Kelimpah nyambut Hari Sarawak, tuju program tu diatur kami iya nya ambika ulih muka peluang ngagai sida ti rinduka pengawa ngena motosikal bekunsika penemu enggau orang ti udah landik ba pekara tu.

“Pia mega, program tu dikena kami meri penerang sereta ngelalau sida ke nembiak ambika ngembuan disiplin sereta deriba enggau ulah ti menyana lebuh ba jalai alun.

“Program tu mega dikearapka ulih meri penyedar sereta nyeliahka raban nembiak gereja pengawa ti enda manah baka nyadi “Mat Rempit”,” ku Chrisroyston.

Pia mega kami bisi ngatur promosyen ari raban Rela ti nerangka tuju penumbuh ejensi tu sereta nama tanggungpengawa ti dipejalaika Rela, ku iya seraya madah sida nyelinting raban nembiak besekula ba Sekula Sekondari (SMK) Pakan sereta mega genap iku raban nembiak ba menua tu.

“Keterubah iya, program tu digaga ungkup 20 iku penyereta aja lalu raban ti dituju khas enggau program tu iya nya sida ke nembiak.

“Tang aku enda nyangka program tu nerima sambut ti chukup manah ari semua raban nembiak ti bisi datai ari menua bukai.

“Tu nyengkaum sida ti nemu rita program tu ti datai ari menua Miri, Sibu, Sarikei, Julau, Kanowit, Durin sereta ke mayuh agi endang nembiak ari Pakan tu empu,” ku terang iya.

Dalam program tu mega, mayuh aktiviti udah dipejalaika dikena ngerichahka agi pegawa ngintu Hari Sarawak.

Entara aktiviti ti digaga iya nya Konvoi Hari Sarawak ti berengkah ari Stadium Pakan nyentukka Sungai Litok Riverine Park.

Pia mega, bisi diatur licha khas bekaul chara deriba enggau betul, chara nyaga ulah maya deriba, promosyen dikenataika Rela enggau mega pengawa bekunsika tanda isyarat jari lebuh ngaga konvoi.

“Program tu udah bejalai enggau lanchar lalu aku muji ulah bala nembiak ke bisi enggau masuk program tu.

“Sida iya udah ngayanka disipilin ti chukup manah lebuh bejalaika semua tanggungpengawa ti udah diberi sepemanjai program tu diatur lalu aku ngarapka disiplin sida iya enda berubah udah tu.

“Enggau pengawa ngaga aktiviti ke bakatu, dikearapka kitai ulih muka peluang ngagai raban nembiak ambika sama begulai enggau kitai nyambut hari ti pemadu iya besejarah ungkup menua Sarawak.

“Aku ti nyadi Komiti Pengatur Program ngarapka raban nembiak ulih tuai runding sereta taluk ngagai menua enggau bansa,” ku tandu Chrisroyston.

Pekara lumur dua kelimpah ari ngintu Hari Sarawak ku terang Chrisroyston, iya nya tu mih chara nyeliahka raban nembiak ngereja ulah ti enda menyana baka belumba motosikal ti enda dikemendarka.

Kenu ku iya, komuniti ti siru kelebih agi sida ke bisi minat ba pengawa motosikal mesti ngayanka penyiru sereta meri bantu nengah servis sosial ngagai komuniti ambika ulah tu dikemeranka belama iya.

“Aku ngarapka raban nembiak Pakan sepengudah tu ila, ngembuan ulah ti manah, disiplin ti tinggi sereta mega ulih nyadika ketuai lalu ulih nyadika penyambung ngatur program ke bakatu.

“Laban program tu endang chukup engkeman diatur kitai ambika ulih ngurangka agi pengawa ti enda menuku ti ulih ngerusak raban nembiak.

“Terima kasih ngagai Tim Marshall ti semampai meri sukung lebuh ngereja aktiviti tu lalu aku arapka semua teulihka pemujur,” tandu Chrisroyston.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak