PAKAN: Parti Rayat Sarawak (PRS) Pampang Pakan ngarapka Datuk Joseph Salang Gandum ulih dipilih bediri baru ba sitak Parlimen Julau.

Sapit Chairman PRS Pakan, Kaunselor Jantan Uchong madahka, peneleba ke dikembuan Salang ti mega Presiden PRS endang beguna amat dikena ngambi pulai baru penuduk Julau ungkup Gempung Parti Sarawak (GPS) ba Pengawa Bepilih Besai (PRU) ke-15 tu ila.

Kaunselor Jantan Uchong

“Kami di Pakan, kelebih agi kaban parti endang dekaka Salang baru nyadika chalun kami ditu dikena napi pengawa bepilih ti deka datai.

“Nya alai iya ti nyadi Presiden parti enda patut enda ulih bediri sekali agi ungkup sitak Parlimen Julau lalu ngambi pulai penuduk tu.

“Aku ngarapka, semua rayat di Julau begempung lalu ngangkatka Salang sereta beserakup nyukung chalun ari GPS,” ku Jantan.

Iya mansutka jaku tu ba pengerami Ngiling Tikai ti diatur PRS Pakan enggau kerejasama Komiti Pemansang enggau Pengelikun Genturung Pendiau (JKKK) Rumah Morris Nyanong Nyalak Ili lemai kemari.

Ku tandu iya, sida iya ukai enggaika orang baru ti bisi mandangka diri nyadi chalun tang Salang agi mengkang deka dipilih ngarika GPS tu ila.

Iya mega meri besai terima kasih ngagai kerejasama ti udah dipandangka semua raban dalam komponen parti dalam GPS ti talukka parti sereta nyukung chalun sida iya.

Jantan mega nerang, ba dalam PRS endang nadai penyarut ti nyadi entara raban parti tang sida iya semampai besukung pangan diri ti ngasuh PRS tegap agi.

Suara Sarawak