BISI GAYA…Dun Speaker Tan Sri Datuk Amar Mohamad Asfia Awang Nassar (tengah) begulai enggau Chairman Pengatur Program Abdul Taib Yusof (kaban) mandangka bungai silat seraya dikematka Presiden Rumpun Silat Sarawak Muhd. Haneef Ali (kiba).-Gambar RAMIDI SUBARI

KUCHING: Seni nyaga diri tradisional baka silat patut ditan, lebih agi ba nembiak rebak baru ngambika ulih nampung main asal nya nyentuk ke jemah ila.

Speaker Kunsil Nengeri (Dun) Tan Sri Datuk Amar Mohamad Asfia Awang Nasar madah laban silat udah diaku nyadi main entarabansa, nyadi nembiak diperansang belatih lalu ngambi bagi ba main nya.

Kenu ku iya, silat ukai semina main tang mega sebagi ari sejarah ke ditampung nyentuk ke sehari tu.

“Pia mega, iya udah diaku nyadi main entarabansa nyentuk ngadaka champion entarabansa ari nengeri Sarawak.

“Nya alai, aram mih kitai sama ngelatih sida ke biak pasal silat ngambika sida ulih nyadi landik ba pekit ke diatur ba serata dunya.

“Buka kelas latih enggau gerempung silat bukai ba nengeri tu ngambika sida ulih belajarka mayuh penemu pasal chara nyaga diri ba mayuh bansa bungai silat,” ku iya.

Iya madah munyi nya maya bejadika Pengerami Silat Entarabansa Pesaka Dunya enggau Pekit Silat Dunya 2022 Renggat Nengeri di Go Down Amphitheatre, Kuching Waterfront, Hari Enam.

Tandu iya, sebaka enggau seni nyaga diri ke bukai, pengawa tu ulih nyeliahka raban nembiak ngereja ulah ke enda menuku baka gian dadah.

“Berebak enggau nya, iya mega dikena mantu nempa pemanah ulah enggau nempa disiplin sida,” ku iya.

Speaker Dun nya mega minta mayuh agi pengajar silat ngelatih sida ke biak bekaul enggau seni nyaga diri enggau ngelatih sida nyadi jaguh silat.

Ba pengerami nya, Asfia bisi nyuaka chek RM20,000 ungkup Rumpun Silat Sarawak (RSS) Wilayah Kuching lalu diterima chairman iya Abdul Taib Yusup.

Abdul Taib ke mega chairman program nya madah seni silat ulih mantu nyeliahka nembiak ngereja ulah ke enda menuku, kelimpah mantu sida nempa disiplin diri.

“Gerempung ngarapka main asal silat ulih dikerembai ngagai raban orang gawa perintah enggau peribit nyengkaum palan pelajar dikena mantu sida ke bisi nempa pemereti ati,” ku iya.

Iya mega madah bisi 34 menua enggau urung 1,500 penyereta deka ngambi bagi ba Pekit Silat Dunya 2022 di Melaka ti deka berengkah 26 nyentuk 31 Julai tu.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak