Jabu (dua kiba) nyuaka tepa sebilah ilang ngagai Uggah (dua kanan) rambau Pengerami Makai Lemai Gawai Kelab Saribas malam ensana.

KUCHING: Replika bujang berani Iban tauka Kubu Rentap deka digaga ba taba asal di Bukit Sadok.

Sapit Premier Sarawak Datuk Amar Douglas Uggah Embas madahka perintah nengeri udah besetuju ngaga projek tu ungkup ngangkatka sektor dagang temuai di Betong.

“Premier Sarawak (Datuk Patinggi Tan Sri Abang Johari Tun Openg) apin lama ngemendarka agih belanja RM16 juta ungkup projek tu nyengkaum perengkaguna ti dikena ngemanahka palan nya,” ku iya.

Uggah bejaku munyi nya rambau Pengerami Makai Lemai Gawai Kelab Saribas malam ensana.

Ku iya, pekara tu dikeandalka deka narit raban temuai ti datai ke Betong nengah Jalai Raya Pan Borneo, Jalai Raya Kedua enggau Palan Penerebai Bilun Bebuling enti udah tembu ila.

Berebak enggau nya, Uggah madahka pengaga diri ngagai Abang Johari laban udah numbuhka Ejensi Pemansang Bersepadu Betong (Bida) ti dikeandalka deka ngelengkaska pemansang ba kandang menua nya.

Ku iya, sitak dipegai Bida mungkur Dun Layar, Bukit Saban, Saribas, Krian, Kabong, Kalaka, Beting Maro enggau sekeda menua di Dun Lingga.

Sama bisi datai bini iya empu Datuk Doreen Mayang, Kaban Parlimen Betong Datuk Robert Lawson Chuat, Adun Layar Datuk Gerald Rentap sereta ex-Sapit Kepala Menteri Tan Sri Alfred Jabu.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak