KELAI BASA…Ikmal Hisham benung ngelekatka PJM ngagai siku penerima ba sebuah hotel tebilang ditu kemari.

KUCHING: Sepenyampau 713 iku raban veteran Soldadu Malaysia (ATM) nerima Pingat Jasa Malaysia (PJM) kemari.

PJM diberi ngagai bala soldadu ti kala gawa dalam operasyen sepengelama tiga bulan tauka enda kurang ari enam bulan sereta formasyen ATM bagi timpuh 1 Januari 1969 nyentuk 2 Disember 1989 maya ngelaban Parti Komunis Malaya (PKM).

Kelimpah ari nya, PJM mega diberi ngagai raban soldadu ti kala gawa bagi timpuh 1 Januari 1969 nyentuk 17 Oktober 1990 bagi operasyen ngelaban Parti Komunis Kalimantan Utara (PKKU).

Nangkan nya, raban soldadu ti udah midang, bakal enggau nyadi orang nyelai pendiau (OKU) lebuh gawa ngelaban PKM bagi timpuh 1 Januari 1969 nyentuk 2 Disember 1989 enggau ngelaban PKKU bagi timpuh 1 Januari 1969 nyentuk 17 Oktober 1990 mega bisi diberi PJM.

Pengawa meri PJM nya dipenyadika Sapit Menteri Pengelikun Malaysia Datuk Sri Ikmal Hisham Abdul Aziz ba sebuah hotel tebilang ditu kemari.

Anugerah PJM keterubah diatur kena 3 March 2004, endur ngelaika raban veteran tu ti udah bebendar nyaga, sereta ngetanka menua lebuh ngelepaska Malaysia ari diruga penyelawai.

Nyentuk diatu bisi 31,221 iku raban veteran ATM udah nerima PJM ke alai sida ti bedau nerima deka diberi anugerah nya ba maya ti deka datai.

Sama bisi datai Panglima Medan Timur TD Lt. Jen Datuk Mardzuki Muhammad ngarika Panglima ATM Laksamana Madya Datuk Sabri Zali, Adun Batu Kitang Lo Khere Chiang enggau bala bukai.

Suara Sarawak