NYULUT…Datuk Dr Azhar Ahmad (tiga kanan) nyuaka setipikit ngagai siku nembiak nyulut STPM 2021 ba pengawa mantaika pemutus peresa STPM 2021 Sarawak di Limbang, kemari. -Kredit Gambar FB Tracy Sia

KUCHING: Sepenyampau 95 ari 5, 769 iku chalun di Sarawak bulih purata nilai gred kumulatif (PNGK) 4.00 dalam Setipikit Tinggi Sekula Malaysia (STPM) 2021.

Direktor Opis Pelajar Sarawak, Datuk Dr Azhar Ahmad madahka penyampau nya nambah 0.09 peratus dibanding 89 iku ti bulih pemutus sama ba taun 2020.

“Pia mega, bisi 1,924 chalun tauka 34.23 peratus bulih PNGK 3.00 ke atas.

“Bryan Lim Kien Seng ari Sekula Sekondari (SMK) Sacred Heart, Sibu diaku chalun pemadu manah STPM Nengeri Sarawak.

“Tambah mega, siku nembiak pelajar khas (MBPK), Nur Hamizah Mohd Fuzi (kategori enda lansik) ari SMK Bako bulih pemutus nyulut iya nya PNGK 3.42,” ku iya.

Azhar mansutka jaku nya lebuh mantaika pemutus peresa STPM 2021 Sarawak di Limbang, kemari.

Ku iya, PNGK ba Sarawak taun tu iya nya 2.71 ke nambah 0.06 dibanding taun 2020 ke ngerikod 2.65.

“Pia mega peratus nya entara dua pemadu manah ba timpuh semilan taun sistem modular STPM dipejalai,” ku iya.

Nambahka nya nya ku iya, 5,532 iku chalun tauka 98.42 peratus mujur bulih setipikit STPM dibanding 5,454 iku chalun (98.23 peratus) ba taun 2020.

“Ari penyampau nya, bisi 31 iku chalun (0.55 peratus) pass lima subjek (5P), 3,968 iku chalun (70.59 peratus) mega pass empat subjek (4P), 870 iku chalun (15.48 peratus) pass tiga subjek (3P) enggau 411 iku chalun (7.31 peratus) pass dua subjek (2P).

“Bisi 252 iku chalun (4.48 peratus) pass abis nadai siti subjek (1P). Bebida enggau peresa Sijil Pelajaran Malaysia (SPM), nilai purata gred ke lebih besai mai reti pemutus nya lebih manah dalam peresa STPM,” ku iya nerang baru.

Azhar madah, 15 ari 21 subjek ti diambi chalun di Sarawak niki peratus pass dibanding taun 2020 seraya siti subjek meruan bulih 100 peratus iya nya subjek Perakaunan.

Ngelansa silik, iya madahka bisi 10 buah sekula di Sarawak bulih pemutus nyulut enggau ngerikod PNGK lebih 3.00.

“Tu nyengkaum SMK Bako (Kuching), SMK Sacred Heart (Sibu), SMK Batu Lintang (Kuching) enggau SMK Merbau (Miri).

“Sama mega SMK Sungai Merah (Sibu), SMK Green Road (Kuching), SMK Kampung Nangka (Sibu), SMK Saribas (Betong), SMK Tung Hua (Sibu) enggau SMK Asajaya (Samarahan).
“Bisi 44 ari 78 buah sekula udah niki PNGK tauka 56,41 peratus ari semua sekula,” ku iya nerang silik.

Suara Sarawak